Upat ka turutot
Magsuwat unta ko mahitungod sa Kalagkalag apan nadapit ang akong pagtagad ning gi-text nga pangutana sa nagpaila nga nagpakabana nga magbubuhis: Nganong tulo man ang tigpamaba ni Bise Presidente Jejomar Binay? Sa di pa nako tubagon ang iyang pangutana, palihug tuguti nga ako siyang kurhian: Di tulo kon dili upat ang tigpamaba ni Binay.
Makapahibung tinuod kay hapit matag adlaw makabasa o makabati o makakita ka og pamahayag pagpanalipod ni Binay gikan nilang: Atty. JV Bautista (kanhi human rights lawyer ug kanhi party-list representative), Gobernador Jonvic Remulla sa Cavite, Joey Salgado (nga nagpailang opisyal nga tigpamaba sa buhatan sa bise presidente) ug Kongresista Tobias Tiangco sa Navotas.
***
Pasayloa na sab, apan sa di pa ko motubag sa pangutana, mobalising ko og diyutay. Tagsa ray tigpamaba sa labing inila nga lokal nga mga opisyal sa Sugbo. Kasagaran nila tagsa rang igkita kay ang mga opisyal mao may mangunay sa pagtubag sa mga pangutana sa media. O tingali kay way bisan usa nilang nahiagom og eskandalo nga sama kalisod sa kang Binay.
Dul-an na sa tuig nga wa kong kadungog ni Carlo Dugaduga, ang public information officer sa Cebu City Hall, kay mas tabian man si Mayor Mike Rama kay niya. Nakalimot na ko kinsay tigpamaba ni kanhi mayor Tommy Osmeña kay way makapuli sa kalantip sa iyang pangaway.
***
Dugang balising: Nalabwan lang og usa ni Binay ang gidaghanon sa mga tigpamaba ni Presidente Noynoy Aquino--silang Presidential Spokesman Edwin Lacierda, Communications Secretary Herminio Coloma ug Deputy Presidential Spokesperson Abigail Valte.
Wa gyoy taga Malakanyang ang nipasabot nganong managlahi ang sinultihan nilang Lacierda ug Coloma mahitungod ni Binay: Si Lacierda sigeng bunal, samtang si Coloma sigeng dupa. Tungod ba kay si Lacierda sakop sa Balay Group ni Interior Secretary Mar Roxas ug si Coloma sakop sa Samar Group ni Executive Secretary Paquito Ochoa nga suod ni Binay? Bugtong naklaro mao nga si Valte maoy luyuluyo nilang Lacierda ug Coloma.
***
Karon, mangahas na ko pagtubag sa pangutana: Upat ang tigpamaba ni Binay kay di siya ganahan nga direktang manubag sa mga pasangil sa pangurakot batok niya. Di tingali siya ganahan nga mapareha ni Roxas, nga way tigpamaba, nga kasagaran saputon kon di ganahan sa mga pangutana sa media. Magpa-interview lang si Binay sa mga sakop sa media nga mosugot nga diktahan unsay ganahan niyang mga pangutana.
May timaan hinuon nga bisan ang mga tigpamaba ni Binay, nga may mga adlaw nga mapugos sa pagnukus-nukos sa ilang mga pamahayag aron lang matubag ang bag-ong mga pasangil, nakabatyag nga di na epektibo sa ilang trabaho: Nanung na sila sa Senate Blue Ribbon subcommittee aron paglawgaw sa imbestigasyon nga gikahadlokan sa ilang agawon.
- Latest
