Kinsa man si Laureano Gregorio? Hain man siya? Nganong wa may nagtagad pagpatawag niya sa nagpadayong imbestigasyon sa Senate Blue Ribbon subcommittee sa mga pasangil sa pangurakot batok ni Bise Presidente Jejomar Binay? Kahibulongan nganong way nangita niya bisan sa nabutyag nga mahinungdanon niyang papel sa kontrobersiyal nga asyenda sa Rosario, Batangas:
• Si Binay, nga nakalimot na pila ka ektarya ang iyang luna sa Batangas, nitug-an nga si Gregorio ang iyang gibaligyaan sa kabtangan dihang napili siyang bise presidente niadtong 2010; ug
• Si Antonio Tiu, ang nangangkon nga tinuod nga tag-iya sa asyenda sa Batangas, nihingan ni Gregorio nga maoy iyang gipalitan sa 145 ka ektarya nga luna.
***
Laing kahibulongan: Wa maapil si Gregorio sa listahan sa mga tag-iya sa kontrobersiyal nga asyenda nga gipagawas sa Batangas Provincial Assessor's Office nga naglakip nilang Maria Guico, Renato Comia, Lynette Desphy, Murielle Desphy, Maximillian Desphy, Hilario Comia, Balbino Perez ug Benito Alday.
Usa nila, si Maria Guico, nikumpisal nga napalit ni Binay ang iyang 2.9 ka ektarya nga luna baleg P1.3 milyones niadtong 2004. Laing naapil sa listahan, si Renato Comia, niangkon nga drayber ug guwardiya siyang Binay gikan sa 1986 ngadto sa 1990. Pulos sila nakaila ni Binay. Way bisan usa nila nga naghisgot ni Antonio Tiu ug Laureano Gregorio.
***
Kon imong kalimtan kadiyot ang kabatan-on, kamasaligon sa kaugalingon ug nagpungasi nga mga pangangkon sa kadaghan og pasidungog, mga produkto ug mga kompaniya ug katigayonan ni Tiu sa iyang pag-atubang sa mga senador, nga iya pa ganing giawhag nga mangayo og pasaylo niya, gawas nga gikiha na niya si Senador Antonio Trillanes IV, makapahibung ang mosunod:
• Ang 145 ka ektarya nga luna, nga sa iyang testimoniya sa Senador gipresyohan ni Laureano og P456 milyones, gipasiunhan lang niya og P11 milyones ug hingpit nang nakontrolar ang kabtangan, nga nagsige nag sangyaw sa media nga siyay tinuod nga tag-iya; ug
• Wa na siyang kahinumdom kanus-a ang binayranay, asa ang resibo ug pilay buhis sa transaksiyon.
***
Mahimong makapatin-aw sa misteryusong pagpanag-iya sa asyenda sa Rosario, Batangas ang taho sa Newsbreak niadtong 2001, nga maoy labing unang nibutyag sa pagpamalit ni Binay og mga luna sa Batangas. Gikutlo sa Newsbreak ang mga nangangkong suhito sa mga transaksiyon: Gipamayran ni Binay ang orihinal nga mga tag-iya sa ubos kaayong presyo, wa usba ang mga dokumento sa pagpanag-iya, apan gitipigan ang tanang titulo sa mga luna.
Mao ni hinungdan nganong way ngan Binay sa mga dokumento sa munisipyo apan ang mga tag-iya nga padayong nalista sa assessor's office wa nay bisan gamayng labot sa pagduma ug pagpalambo sa mga luna. Makatabang pagtukas sa misteryo ang pag-ila ni Laureano Gregorio.