Sapa hawanan g'yud

Maayo g'yud nga pasakaan og kaso ang mga ginikanan niadto'ng 14-anyos nga dalagita nga nadakpan sa kapolisan ug nakuhaan og mohapit usa ka kilo nga shabu kaniadto'ng Biyernes sa gabii.

Klaro kaayo nga ang mga ginikanan sa mao nga dalagita nagpasagad lang sa ilang katungdanan isip ginikanan. Kun nagtagad pa sila nasayod unta sila kun unsay gihimo sa ilang anak.

Pinaagi sa pagpasaka og kaso batok sa ginikanan sa maong batan-on, makahatag kini og leksyon ngadto sa ubang mga ginikanan nga moatiman gayud sa ilang mga anak.

Ngano'ng magpatuga-tuga man og himo'g pamilya nga wala pa man diay mohingkod ang ilang pangisip sa tukma nga gimbuhaton sa usa ka ginikanan?

Ang katungdanan sa ginikanan mao ang pag-atiman sa ilang mga anak, paghatag og tukma nga pagkaon, paghatag kanila og sapot, ingon man ang pagpa-eskuwela.

Tingali kun gituman pa sa maong mga ginikanan ang ilang katungdanan dili gayud mosulod sa binuang ang ilang anak. Unya, ang mga polis mihukom nga ikiha g'yud ang dalagita ug depende na ang fiskaliya nga mohukom.

Sigurado g'yud hinuon kini nga i-dismiss kay mao man kini ang gilatid sa Republic Act 9433 nga ang mga 15-anyos paubos, dili mahimo'ng mapasakaan og kaso.

Na hala, kun dili mo makagusto niini, tulisoka ninyo ang nagsugyot sa mao nga balaod nga si kanhi Senador Kiko Pangilinan.

* * *

Husto g'yud ang hukom sa mga opisyal sa Cebu City Hall nga ipahigayon ang re-blocking sa nasunogan sa Sitio Palma, sakop sa Barangay San Roque, dakbayan sa Sugbo.

Angay 'sab nga daygon kun idayon nga dili na patukoran og balay ang tres metros gikan sa tampi sa sapa kilid sa nasunogan. Ang daplin sa karsada pahimoan pa g'yud og aseras nga kaagian sa mga tawo.

Kun ma-reblock na ang mao nga dapit, mohapsay na ang pinuy-anan. Apan sigurado ko nga dili masulod ang kapin sa 200 ka pamilya sa mogamay na lang unya nga lugar.

Daku-dako man g'yud ang maiban kun ang tres metros gikan sa tampi sa sapa dili na maugbokan og balay unya butangan og aseras ang daplin sa Palma Extention.

Ang nakabentaha kay gipasalig sa mga opisyal sa dakbayan sa Sugbo nga kadto'ng dili na makabalik pagtukod hatagan g'yud og luna nga kabalhinan.

Kun ako ang pagbut-on, kadto'ng mga pamilya nga namuyo daplin sa sapa maoy dili na angay'ng pabalikon pagtukod og kabalayan sa dapit nga ila kanhi'ng nahimutangan.

May hulagway ko sa mao nga dapit kaniadto diha'ng wala pa kini masunog ug hilabihan kagubot. Ang ubang haligi sa "extention" sa ilang mga balay anaa na g'yud magbarog sa sapa.

Sa ngadto-ngadto kun pasagdan lang, ang sapa tingali mahanaw na sama sa nahitabo sa sapa-sapa diha sa Barangay Caretta nga dili na makita kay gitukoran na'g kabalayan ang sapa.

Anhi nato makita ang political will sa atong mga opisyal sa dakbayan. Dili 'sab tukma nga papadayonon lang g'yud pagpuyo ang daghang pamilya sa huot kaayo nga dapit.

Wala malilong kanako nga ang mao nga dapit adunay mga illegal nga sugal ug pagpamaligya'g shabu, walay labot sa pagpangawat og koryente.

Pipila ka adlaw sa wala pa kini masunog, nakadawat ko'g report og gani wala pa kini nako mahatag sa kapolisan aron unta kahimoan og operation.

Pagkadungog gud nako nga nasunog ang mao nga lugar, sa hilom nakaingon ko nga misampot na g'yud ang pagpangawat og koryente nga tingali maoy hinungdan sa sunog.

Na hala, leksyon kini sa mga tawo nga kun adunay mga binuang sa ilang mga silingan dili lang magtagad kay mahadlok nga panimaslan. Kun maghadlok-hadlok mo pagtug-an sa ilang binuang, sama karon, apil mo nga nabiktima sa sunog.