Maluoy mosakmit sa mga video karera

Kataw-anan ang panganti ni Police Regional Office -7 Director Prudencio Tom Bañas nga ambisyon niya nga modakop g'yud og mga druglords.

Buyno, nindot nga adunay panglantaw si Chief Superintendent Bañas nga gusto niya nga kab-oton atol sa pagdumala niya sa kapolisan dinhi sa Central Visayas.

Apan wala ko magtoo nga makakab-ot siya og kalampusan sa iyang gitinguha. Una, ang mga "druglords," sa akong nahibaw-an dili gayud mohikap og shabu, dili sila magtipig og shabu sa ilang balay.

Igo ra sila nga magmandar sa ilang mga sinaligan. Aw buyno, kun ang mga sinaligan niini'ng mao nga mga druglords tawgon na nato nga sila ang druglord, makaangkon na og kalampusan si Sir Bañas.

Dinhi sa Sugbo, tunog kaayo ang mga ngalan sa giingon nga druglords, apan nadakpan ba gud sila? Wala kay ang mao nga mga tawo dili man motipig og shabu sa ilang balay ug dili usab mohikap og shabu.

May usa man gani ka ilado kaayo nga druglord nga adunay pending warrant of arrest wala man gayud madakpi sa mga polis bisan ug nga usahay mokalit ra kini pagtunga dinhi sa dakbayan.

Mosamot na nga lisud nila nga madakpan ang ubang druglords nga walay mga warrant of arrest.  Mao nga kataw-anan kaayo nga matuman ang pangandoy ni Sir Bañas nga pangdakpon niya ang mga "bigtime druglords."

Anam-anam lang sir. Bisan "level two" drug pushers nga makakuha ta og tag-usa ka kilo nga shabu malipay na ang publiko sa ingon niana nga kalampusan.

Ang maayo'ng buhaton ni Sir Bañas mao nga unahon usa nimo pagsumpo ang migrabe na pag-ayo nga sugal, masiao, video karera, tigbakay nga giprotehean sa mga opisyal sa barangay.

Base sa nadawat nako nga mga report, pwerte ang pagkatap karon sa video karera ug ang mga opisyal sa kabarangayan, sama ni Duljo-Fatima Barangay Captain Elmer Abella maluoy man mohimo'g kampanya sa iyang mga katagi-lumolupyo.

Ang rason niya nga maluoy siya kay panginabuhian kuno unya ang wala niya itug-an nga kuyaw kaayo'g mapilde ka na sa sunod eleksyon.

Kini maoy angay'ng hingusgan usa nimo Sir Bañas sama sa gihimo kaniadto ni kanhi PRO-7 director Marcelo Garbo nga gipaspasan ang paghimo'g kampanya sa illegal nga sugal.

Base sa report nga miabot nako, ang video karera mikatap sa barangay ni Kapitan Abella sa Duljo-Fatima, sa Barangay Suba ug Pasil, dayon sa Ermita.

Likud ra g'yud nga bahin sa Carbon Police Station adunay mga video karera nga gi-operate ug diha sa Sitio Bato ug Ermita Proper, apan wala himoi og lihok sa mga polis sa Carbon.

Alang 'sab ni Acting Cebu City Mayor Edgar Labella angay nimo nga mandoan ang mga polis sir nga molihok g'yud. Unya kinahanglan nga si Sir Noli Romana, direktor sa Cebu City Police, pangdukla ang imong mga hepe nga nagkyogpos lang ug walay gihimo sa mga illegal nga kalihukan sa ilang teritoryo.

Unya, kay wala man g'yuy ayo nga labok kini'ng PDEA batok sa gitahas kanila nga kampanya batok sa gidili nga matang sa drugas, mas maayo tingali Sir Bañas nga witik-witiki na lang 'sab bisan og level 2 ra ang inyong makuha maayo na lang.