Tsamba ni Cuizon

Labaw sa pasiatab sa lokal nga mga opisyal nga andam silang mopakatap og mga sakyanan aron mahakot ang matanggong nga mga pasahero matag higayon nga manghulga og welga ang militanteng transport groups, mahimong si Regional Director Ahmed Cuizon sa Land Transportation Franchising and Regulatory Board ang nakakita og mas epektibong sulbad.

Gihangop sa mga Sugbuanon ang presensiya sa higanteng buses sa mga ruta sa public utility jeepneys  niadtong Miyerkules kanus-a gikahadlokan nga matanggong ang mga pasahero tungod sa pagtambong sa mga drayber sa public hearing nga gipatawag sa Cebu City Council pagtuki sa dakong pagburot sa multa sa nagkalainlaing kalapasan sa mga lagda sa trapiko.

***

Wa gyod tingali magtuo ang mga drayber nga nibiya sa ilang mga ruta nga magsilbi ang lakang ni Cuizon. Kay naanad na sila nga sama sa mga pangandam sa local government units wa sab mosalir ang nangaging mga pagsuway ni Cuizon pagtapak sa dakong haw-ang sa kadalanan.

Sa nangaging mga protesta igo lang niawhag si Cuizon sa ubang PUJ operators sa paglabyog sa di ilang mga ruta diin natanggong ang daghang pasahero sa way pagpangayo og permiso gikan sa LTFRB. Apan ning higayona ang bus operators na gyod ang gitugotan ni Cuizon sa pagsud sa mga ruta nga alang ra unta sa PUJs.

***

Ug ang bus operators nga nihangop sa tanyag ni Cuizon wa magpaabot nga magkuwang ang PUJs. Wa sila maniid natanggong na ba ang mga pasahero una nipakatap sa nagbuntaog nilang buses sa labing dagkong kadalanan sa Metro Cebu.

Bisan nabag-ohan sa pagsubay sa buses sa Osmeña Boulevard, Banilad-Talamban corridor ug ubang teritoryo sa PUJs, malipayong nanakay ang mga pasahero. Nadugangan ang ilang kahinangop pagkahibawo nga kuridas nga P10 ray plite bisan asa sila manaog sa gitakda nang agianan. Nibiya man o wa sa ilang mga ruta, ang nagprotesta nga PUJ drivers nakabatyag gyod tingali sa kadako sa naiban sa inadlaw nilang kita tungod sa buses.

***

Masukod pag-usab kon mosalir bang sulbad ni Cuizon atol sa tinuod na gyong welga sa transportasyon nga gihulga sa transport groups sunod semana. Hinaot nga human sa pasiuna nilang kasinatian mas andam nang bus operators pagsubay sa bag-ong mga ruta ug paghakot sa bag-o nilang mga pasahero.

Bisan sa kakuwestiyonable sa ilang kawsa pagsupak sa dakong uminto sa multa, nga masaypang gipasikad sa pagtuong makalapas gyod sila sa mga lagda sa trapiko, mahimong makakuha pa sila og simpatiya sa publiko. Hangtod nga ang mga pasahero maoy ilang gibukubuko. Salamat sa eksperimento ni Cuizon, makalili ta unsay dagway sa kadalanan kon hingpit nang papason ang PUJs alang sa dugay rang gipangandoy nga mas hapsay ug mas barato nga mass transport system. [email protected]