Bisan pa og dako na kaayo og multa nga ipahamtang batok sa mga madakpan nga drayber apan wala kini makapahadlok sa mga badlongon sa pag-abuso sa ilang pagmaneho og sakyanan.
Abi ninyo og ngano? Unsaon pagkahadlok nila nga wala may mga road law enforcers nga nanakop diha sa karsada. Anaa man tuod ang mga traffic enforcers apan dili man sila manakop, maayo man lang sa panighawak.
Ang mga traffic enforcers nagsigi lang og bitbit nianang ilang Traffic Citation Ticket apan dili manakop nga unta daghan man kaayo nga dakponon. Basin tingali og wala sila masayod kun unsa ang balaod nga ilang ipatuman.
Kun pananglit moingon kamo nga wala mo'y Temporary Operator's Permit aron sakmitan og lisensya ang mga base sa kalapasan sa Republic Act 4136 kon Transportation and Traffic Code, ipatuman ang lagda sa City Ordinance 801 dinhi sa dakbayan sa Sugbo.
Apan ngano nga hangtod karon wala pa man gihapo'y kibo ang Land Transportation Office nga unta matud pa ni Acting Regional Director Arnel Tancinco mihulma na man siya og duha ka team sa mga road law enforcers?
Makalagot man gud kaayo tan-awon kini'ng mga sakyanan nga ang mga drayber abusado. Puwerte'ng daghana karon sa mga sakyanan nga gipangtaptapan gihapon ang mga plate numbers og itom nga bildo o plastik.
Kun gipatuman pa ang balaod, sigurado ko nga mahadlok ang mga abusado nga drayber kay P5 mil ang multa niana. Ang uban nga sakyanan "dilapidated" ang plate numbers, nagpasabot nga putol ug kuwang ang mga numero ug letra.
Daghan nga motorsiklo ang plate numbers anaa gipasok sa ilawom sa tapaludo sa ligid nga dili makita, ang uban ang plate numbers anaa gibutang sa kilid nga kun magsunod ka dili makita ug mabasa.
Ang uban nga sakyanan adunay "red light" nga makita sa atubangan nga magsiga panahon sa gabii nga wala itugot sa lagda. Apan labaw na g'yud nga makalagot ang mga sakyanan nga walay plate numbers.
Kanus-a pa man kita molihok? Ako'ng awhagon si Joel Maloloy-on nga maoy hepe sa LTO-7 Operations Branch nga molihok na aron katudloan nato og leksyon ang mga badlongon nga drayber.
Unya, awhagon nako sila si Sir Rafael Christopher Yap, CITOM Executive Officer, nga mandoi ang imong mga traffic enforcers nga manakop g'yud dili kay maayo lang sa panighawak diha sa karsada.
* * *
Bisan og ang CITOM Smoke Belching Team kanunay nga mohimo'g kampanya batok sa mga sakyanan nga magbuga og itom nga aso, nagpabilin nga daghan gihapon nga sakyanan nga nagdagan nga puwerte'ng ka-itom og aso.
Usa niini mao kini'ng PUJ nga biyahe og Apas (17B) nga ang Plate Numbers GXB 347. Palihog kuno, dakpa ninyo kini'ng mao nga PUJ kay nakadugang kini sa problema sa atong kalikupan.
Nagsunod ko niini'ng mao nga PUJ kaniadto'ng Domingo sa gabii didto sa Gorordo Avenue, pastilan, ang giagian mora'g adunay nagdaob! Gigukod g'yud nako aron makita ang plaka ug akong naapsan kay mihunong sa JY Square.
Kiat ra ba kaayo ang drayber sa mao nga higayon, mora'g nakapanag-iya og karsada nga walay kukahadlok nga makabag-id og laing sakyanan. Kinsa ba'y tag-iya niini nga sakyanan?
Sigi ka lang og dawat sa abang og wala nimo atimana ang imong sakyanan? Angay ka nga masayod nga kun ang makina sa sakyanan mobuga og itom nga aso nagpasabot kana nga dili na kondisyon ang makina.
Ayaw sakripisyoha ang katawhan nga makahanggap sa aso gikan sa imong sakyanan bugti sa pagsigi lang nimo'g kumkom sa abang sa imong yunit! Patuga-tuga og hupot og sakyanan nga dili kamao moatiman.
Awhagon nako si Konsehal Nida Cabrera, tsirman sa Committee on Environment nga susihon niya ngano nga wala kaayo ipatuman ang ordinansa sa dakbayan kabahin sa smoke belching vehicles.