Kapin na gyud sa duha ka semana nga gibiyaan sa kontraktor sa Department of Public Works and Highways ang giguba nila nga karsada atubangan sa Marco Polo Hotel.
Mura'g walay buot ang tagdumala niini nga kontraktor kay giguba nila unya gibiyaan lang nga wala gani magbilin og pahibalo kun ngano nga wala nila tiwasa ang proyekto.
Ang nakadaot lang kay wala mahibaw-i kun unsa kini nga kontraktor nga gikuha sa DPWH. Kun motawag ka sa opisina sa DPWH Cebu City District Office, walay makatug-an. Utro pa ni ang DPWH nga ingon sa natulog ra sa ilang trabaho.
Anaa man gyud unta sa balaod nga kun adunay government project, butangan gayud kini og billboard nga magtug-an sa publiko kun unsa kini nga proyekto, pila ang kantidad, unsa nga kontraktor ang motrabaho, ug kun pila ka adlaw ang paghuman.
Ngano'ng wala man mabutang ang mao nga billboard? Hain na man ang inspector sa DPWH? Natulog ra mo? Ang mga motorista nga anaa mag-agian diha mata'g adlaw sigurado nga nangasuko na apan giluom lang.
Kini nga kontraktor nga mobiya lang og project nga walay pagpahibalo ngano nga ilang gihunongan, dili na angayan nga hatagan pa og project. Apan unsaon, sagad sa mga kontraktor mga kaklase man sa mga engineer nga anaa sa kagamhanan.
Pagkanindot pa gyud sa karsada diha atubangan sa "main entrance" sa Marco Polo Hotel apan gipaguba ra gyud sa DPWH aron duna sila'y project. Aw, nahibalo na kamo kun ngano nga gusto sila og project.
Tiaw mo, apil ang mga nindot pa kaayo nga karsada sa Gorordo Avenue gituyo ra gyud pagguba aron usbon pag-aspalto. Duna ko'y hulagway nga gitipigan nga ang maayo nga karsada ilang giguba.
Mga walay uwaw! Nangita ra gyud og project mao nga bisan ang maayo pa nga karsada tuyoon ra g'yud sa pagguba. Ang V. Rama Avenue nga libaongon kaayo wala ayoha. Nganong nahimo man tawon mo nga engineer uy!
* * *
Husto ra usab nga gikiha didto sa Ombudsman-Visayas ang mayor sa Daanbantayan aron masuta kun tinuod ba gyud nga dili siya makiangayon sa paghatag og tabang sa mga biktima sa bagyo didto sa iyang lungsod.
Kun ako ang pangutan-on, dili ko makaingon nga husto si Mayor Augusto "Itok" Corro sa iyang pag-ingon nga namolitika ra ang mga mikiha kaniya nga naglakip sa napulo ka kapitan sa barangay.
Dili usab ko moingon nga dili tinuod ang pasangil sa mga mireklamo nga wala sila hatagi og patas nga hinabang sama sa gipanghatag ni Mayor Corro sa ubang biktima sa bagyo nga iyang political supporters.
Mao nga tukma nga ang Ombudsman maoy mosusi niini karon nga may gisang-at na nga kaso nga gipasaka batok sa mayor. Dili usab makiangayon kun tinuod nga ang gihatagan og pabor ni Mayor Corro mao ra kadtong iyang mga suod.
Apan dili usab tukma kun ang mga namasangil naghimo lang og mga buhat-buhat nga pasangil aron dauton ang mayor. Angay nga paspasan kini sa Ombudsman ang pagsusi sa reklamo.
* * *
Grabeha uy, mogradwar na lang sa kolehiyo ang first batch sa mga Cebu City scholars apan daghan gihapon kanila kausa ra gyud makadawat sa gisaad nga school supply allowance nga P1,000 mata'g semester.
Tukma kaayo ang editoryal sa Banat News kagahapon nga "gihimo ang saad aron lang pakyason." Makapahibulong lagi kaayo kay samtang aprobado ang kinatibuk-an nga budget sa scholars, apan wala ihatag ang school supply allowance.
Bisan og daghan ang nagbagolbol, wala gyud tagda sa mga opisyal sa City Hall ang reklamo kay ang mga scholars dili man mokampanya sa mga politiko atol sa eleksyon.
Tan-awa ang mga kapitan ug konsehal sa barangay, pinangga kaayo nga kanunay'ng hatagan sa ilang mga honorarium matag buwan. Kangil-ad g'yud sa politika nga maayo lang mopasalig atol sa kampanya.
Kun makalingkod na gani sa katungdanan, lingiw-lingiwan na lang ang ilang gipangsaaran. Pagka bakakon baya tawon ninyo. Wad-a na lang ang school supply allowance aron walay magsalig!