Kumusta na ang imbestigasyon?

Nindot gyud kaayo kun apilon pagkiha ang mga opisyal sa barangay nga mapakyas paghipos sa mga basura diha sa tagsa-tagsa nila ka dapit aron molihok na gyud sila.

Tiaw mo nga bisan alas 9 na sa buntag kagahapon naglaundok ang mga basura nga wala gyud mahipos diha sa dalan Colon, eskina Osmeña Boulevard. Gikuhaan gyud gani nako kini og hulagway.

Kinahanglan nga tinud-on ni Grace Luardo nga ipangkiha ang mga kapitan ug ubang opisyal sa barangay nga magmika lang sa ilang katungdanan.

Nasentro kang Luardo ang pagtutok karon sa mga opisyal sa kabarangayan apil gani sa Department of Public Services (DPS) dihang iya nga gipa-isyuhan og citation tickets kadtong naghatod og mga basura ngadto sa landfill sa Consolacion ug diha sa Inayawan nga wala gibahig.

Ubos sa Republic Act 9003, ang Ecological Solid Waste Management Act, ang mga basura nga mahipos kinahanglang buwagon kadtong malata ug ang dili malata.

Si Luardo nga maoy hepe sa City Environmental Sanitation Enforcement Team (CESET) mibahad gyud nga ikiha niya kadtong mga opisyal sa barangay nga dili motuman sa balaod.

Husto ka Grace nga kinahanglang mag-estrikto na gyud ta. Gidayeg 'sab nako si Rolly Ardoza nga maoy hepe sa DPS kay wala siya molaban sa iyang mga sakop nga naisyuhan og citation tickets.

Mas labing nindot ang sugyot ni Tisa Barangay Captain Philip Zafra nga himuong deputized sa CESET ang tanang kawani sa barangay, apil ang mga tanod ug bisan ang mga utility personnel.

Ang tumong niini nga sa ilang paglakaw-lakaw sa barangay kun aduna sila'y makit-an nga magpataka'g labay og sagbot, dakpon dayon ug isyuhan og citation ticket.

Kun ang mga nadakpan dili lang magtagad sa kalapasan nga ilang nahimo, kinahanglang pasakaan dayon sila og kaso.

Sigurado ko nga daghan kaayo ang madakpan, apan sa ngadto-ngadto mokunhod ra ang gidaghanon kun masayod ang katawhan nga wala na magkomedya pa ang dakbayan sa Sugbo pagpatuman sa balaod.

Kun dili gud ikiha ang mga opisyal sa barangay, dili sila manakop. Kasagaran sa mga opisyal sa barangay hadlok manakop sa mga malapason sa balaod kay hadlok silang mapilde sa sunod eleksyon sa barangay. Dili ba tinuod?

Ang tukma gyud mao ang pagpatuman sa slogan kaniadto ni kanhi PNP Chief Panfilo Lacson nga estrikto nga pagpatuman sa balaod "Without Fear and Favor."

* * *

Nagtuo ko nga ang mga armas nga gigamit pagpatay ni Atty. Noel Archival mga lisensyado. Sobra na kaayo ang pagpakahilom sa atong kapolisan kun unsay kalamboan sa pagsusi nila sa mga slug ug kapsola sa bala nga nakuha gikan sa crime scene.

Ang mga slug nga nakuha gikan sa lawas sa mga napatay magamit kaayo alang sa pakisusi aron mahibaw-an kun kang kinsa nga armas ang gigamit sa pagpusil.

Kana kun nindot og kahimanan ang atong Firearms and Explosives Division (FED) ug ang PNP Crime Laboratory Service (CLS) sa Camp Crame.

Ang mga armas sa pagsugod niini pagpalisensya gipabuto kini aron nga tipigan sa kapolisan ang slug nga migawas gikan sa iyang sumbohan. Kun ang atong kapolisan hitsas sa kahimanan, dali ra nila mahibaw-an og kang kinsa nga armas ang gigamit sa krimen.

Kun wala sila niining mao nga "sophisticated" nga kahimanan, makapangutana kita kun sa unsa man diay ang gamitan sa gitipigan sa slug sa atong kapolisan?

Laing pangutana, anaa pa kaha ang mga sampol sa slug nga gikuha atol sa pag-ballistic test sa armas? Ang gikabalak-an nako kun wala na.

Kinahanglan nga ang Task Force Archival matag karon og unya mohatag sila og kalamboan sa ilang imbestigasyon basta dili lang makadaot sa ilang gitrabaho.

Usahay gud nga kun maghilumhilom na ang kapolisan adunay posibilidad nga sila wala na maglihok. Kun lisod gyud sulbaron, isa na lang sa kamot gud kay sa magsalig ang publiko, ilabi na ang kabanayan sa mga biktima.

Alang kanako, kun ako pa ang polis maikag gyud ko pag-imbestigar niini kay aron iprobar sa publiko ang katakus sa polis paghimo'g imbestigasyon.