Papating sa Telcos

Samtang angayng pakpakan ang mga sakop sa Kongreso sa pagpasar sa baludnon nga magmando sa higanteng mga kompaniya sa telepono pagpada og libre nga text alerts atol sa mga katalagman, apurahon ang mga senador ug kongresista pagpada ini sa Malakanyang ug dasigon si Presidente Noynoy Aquino pagpirma aron mahimo nang balaod, angay tang di molunga sa atong pagpakabana hangtod nga hingpit nang mapatuman.

Wa magnihit ang atong nasud sa maayong mga balaod. Apan kasagaran mapakyas sa pagpatuman. Ug ang telcos wa igdungog sa ilang kamatinahuron sa mga lagda nga bisan makaayo sa kinabag-an apan mahimong makaiban sa nagbuntaog nilang ginansiya.

***

Way lalis nga makaluwas og mga kinabuhi ug makaiban sa dagkong kadaot kon makadawat og tukmang mga pasidaan ang katawhan mahitungod sa nag-ung-ong nga mga bagyo o baha ug sa mapuslanon nga kasayuran human gyod sa mga linog ug ubang katalagman. Di lisod ang teknolohiya nga nahilambigit--igo rang ipada isip libreng text messages ang naandan nga mga pasidaan sa Philippine Atmospheric, Geophysical and Astronomical Services Administration (Pagasa), Philippine Institute of Volcanology and Seismology (Phivolcs) ug ubang mga buhatan.

Apan wa gihapoy garantiya nga moboluntaryo pagtuman ang Telcos. Mahimong modangop na sab sa mga hukmanan pagbabag sa bag-ong lagda. Ang daotang balita mao nga kasagaran paboran sa korte ang kamahigugmaon sa kiha sa Telcos.

***

Mahimong manglawgaw na sab ang Telcos bisan di silang kaggasto bisan usa ka dako sa pagpada sa libre nga text alerts atol sa mga katalagman. Kay napamatud-an na sa daghan uyamot nga mga pagtuon nga ang pagpada sa text messages, bisan unsa pa kadaghan, di magkinahanglan og dugang kable ni kahimanan kay igo lang mokabayo sa sistema nga gitukod alang sa voice calls.

Sa ato pa, angay gani untang laslasan o librehon ang bayranan sa text messages. Apan makigbuno ang Telcos una nila itahan ang ilang minahan sa bulawan. Sa labing uwahing ihap sa National Telecommunications Commission (NTC), kapin sa 500 milyones ka text messages ang ipada sa mga Pilipinhon matag adlaw.

***

Gipakpakan na man lang gyod nato ang Kongreso ning labing uwahing pagsuway pagkumbinser sa Telcos pagtabang sa katawhan nga hagbay ra nilang gikilkilan, angayng banhawon sab sa mga magbabalaod ang nangaging mga balaudnon nga, salamat sa gamhanang lobby sa Telcos, gilawalawaan na lang sa kalimot.

Apil nang sugyot ni kanhi kongresista Clavel Asas-Martinez sa ikaupat nga distrito sa Sugbo nga kuwentahon ang bayranan sa voice calls sa matag pulso (unom ka segundo) inay sa matag gutlo (60 ka segundo). Hinaot nga makatabang pagbanhaw sa kawsa sa iyang inahan si NTC Deputy Commissioner Carlo Jose Martinez. Ug hinaot nga molubay bisan diyutay na lang ang gikaintapan nga paugat ug papating sa Telcos.

***

Email: [email protected].