Gidemalas ko kay usa ka semana na nga wala ko'y Internet connection sa akong balay gikan sa Globelines. Gikawat kuno ang taas-taas g'yud nga kutay sa kable kaniadto pa'ng Enero 12.
Wala lang ko kaayo moreklamo kay abi nako'g dali ra maayo apan naabtan na lang og Huwebes, wala gihapon. Mitawag na ko sa akong mga kontak diri sa Cebu, apan wala gihapon.
Napugos ko pagkontak sa akong mga kaila sa Globe-Manila ug salamat kaayo kay gipagamit ko nila og mobile Internet gadget aron magamit samtang wala pa maayo ang akong Internet connection.
Pasalamatan g'yud nako si Jocel G. de Guzman, head sa external affairs sa Globe's corporate communications division, nga miasikaso paghatag og sulbad sa akong problema.
Ang opisyal nga sama kang Jocel maoy angay nga hatagan og daku pa nga katungdanan.
Kaniadto ra nga kini si Jocel kanunay'ng motabang nako. Sama kun dunay magsamok-samok sa akong phone number nga magsigi'g padala'g advertisement nga wala nako kinahanglana, mahunong g'yud dayon.
Sa wala pa ko magsuwat niining lindog, mikontak na usab si Jocel ug mipasalig og dugang tabang nga monindot pa ang akong Internet connections. Saludo g'yud ko nimo Jocel!
Bisan nasakripisyo ko sa kadugay nahuman sa pag-ayo sa akong Internet connection, sagdi na lang kay gitabangan na man 'sab ko nila. Apan alang sa kontraktor sa Globe nga gitahasan pag-ayo, dalia tawon paghuman ang inyong trabaho.
* * *
Gibalik-balik na nako pagpasabot nga kun ang mga tawo modutdot g'yud ngadto sa karsada atul sa Sinulog Grand Parade, ang resulta mao nga dili na hinoon sila makakita og nindot nga pasundayag.
Dili na man makasayaw ang mga contingents kay gamay na man kaayo ang lugar sa karsada nga adto unta sila mosayaw. Ambot kanus-a kaha makasabot niini ang mga tawo.
Maayo gani kay gituman na ni Mayor Michael Rama ang dugay na kaayo nako nga sugyot nga pangkuhaon ang sementado nga "road separators" taliwala sa General Maxilom Avenue nga maoy nakabalda sa mga dancers sa nanglabay'ng Sinulog.
Tan-awon pa 'sab kon ang huot kaayo nga bahin diha sa Robinsons mapalapdan pa. Tan-aw nako mahimo man pinaagi sa pagkuha nianang center island nga duol sa skywalk.
Pananglit ang center island ilisan ra og sementado nga road separators nga bisan unsang oras mahimong kuhaon, masulbad ra ang problema sa kahuot sa karsada.
Kon anaa na ang mga sementado nga road separators, ang mga kawani sa City Engineers Office of Department of Public Works and Highways angay na g'yud nga dili magpasagad.
Ang nakadaut gud kay magtinapulan ang mga kawani sa City Engineers Office ug sa DPWH. Kon mag-aspalto sila butangan lang nila dayon og aspalto ang karsada nga dili usa kuhaon ang road separators.
Resulta, matabonan ang mga road separators og sa kadugayan, wala na'y road separators nga makita diha sa karsada. Dili ba Acting City Engineer Jomar Poblete?
Ang tukma nga isibog usa ang mga sementado nga road separators kon mag-aspalto. Ibalik kini sa iyang nahimutangan kon mahuman na og aspalto ang maong bahin sa karsada. Sa ingon nga paagi, kanunay nga ang mga sementado nga road separators magtungtong ra sa karsada.
Pastilan tawon mo uy, ako nga dili engineer ug dili consultant sa City Hall, mao na man hinoon ang mohatag og ideya. Kaniadto 'sab ang Escario Street atbang sa Golden Peak Hotel dugay ra nga nahuman pagsemento, apan wala gigamit nga two-way sa mga sakyanan.
Tungod sa akong pag-insistir ug paghagit ni Mayor Rama nga angay na kini nga gamiton og panguhaon ang mga poste sa koryente ug poste sa telecommunications companies nga nagbabag sa karsada, nahimong two-way ang karsada atubangan sa hotel.
Kamo diha sa CITOM, abtika 'sab ninyo nang inyong mga mata. Gipasagdan ra man gani ninyo kanang kanunay'ng pagparking sa aseras sa V. Gullas Street gikan sa karaang USP.
Wala mo kakita nga dunay kanunay magparking sa aseras diha? Nganong dili man kamo kaaksyon ana, gadawat mo'g bayad sa mga tag-iya'g sakyanan?
Kadaghan na nako kini gihatag ang inpormasyon ni Joy Tumulak, ang operations officer sa CITOM, apan walay gihimo. I-clamp kining mao nga mga sakyanan!