Makatabang ang mas sayo nga pagpangandam sa Land Transportation Franchising and Regulatory Board ug ubang mga buhatan sa pagsegurong hapsay ang transportasyon atol ug human sa Piyesta Senyor sa Sugbo. Samtang ang mga tagduma nisentro sa ilang pagtagad sa kalamposan sa piyesta, si LTFRB-7 Director Ahmed Cuizon kaniadto rang naningkamot nga di magbaktas og layo ug nga di matanggong ang mga deboto ug bisan ang mga igo lang naduhig sa pagsera sa daghang kadalanan.
Ning higayona gilambigit nang Cuizon sa pangandam ang Land Transportation Office, City Traffic Operations Management. Philippine National Police ug pribadong bus operators. Hinaot nga molampos na sila.
***
Nahasol nang daan ang mga motorista sa pasiunang kalihokan sa Piyesta Senyor. Gikahadlokan nga mabara nang mga sakyanan inig tak-op sa mas daghang kadalanan sa bisperas ug kahulogan sa piyesta:
-Tibuok hapon nga pagtak-op sa kadalanan nga maagian sa solemneng prosesyon sa imahen ni Senyor Sto. Niño karong Sabado. Enero 18; ug
-Tibuok adlaw nga pagtak-op sa mas daghang kadalanan nga maapil sa ruta sa Sinulog Grand Parade karong Dominggo, Enero 19.
Hinaot nga mamunga ang mga paningkamot nilang Cuizon ug kaubanan pag-iban sa gilay-on sa baktas sa mga Sugbuanon ug mga dumuduong sa Piyesta Senyor padung ug gikan sa Basilica Minore del Sto. Nino, sa kadalanan sa parada ug sa mga sakyanang pamasahero.
***
Gitun-an nilang Cuizon ug kaubanan ang kamapuslanon sa gisugyot nga temporaryong terminals sa buses nga mohakot sa mga pasahero sa naandang plitehan:
-Bakanteng mga luna sa South Road Properties sa Compania Maritima ug sa tapad sa San Pedro Calungsod Chapel sa Mambaling ang gisugyot nga paradahan og buses alang sa mga pasahero padung sa habagatang Sugbo;
-Bakanteng luna atbang sa Museo Sugbo (kanhi provincial jail) sa M.J. Cuenco Avenue maoy paradahan sa buses para sa amihanang Sugbo; ug
-Bakanteng luna sa Taboan Public Market ug dakong hawan atubangan sa San Nicolas Parish maoy paradahan sa buses paingon sa habagatang Sugbo.
***
Andam ang mga manimbahay ug mamistahay sa pagbaktas. Naanad na sila sa gilay-on nga kinahanglang lakwon hangtod nga makatsamba sila og kasakyan. Gikahadlokan hinuon nga mas hasol ang pagbaktas kon matinuod ang pasidaan sa Pagasa nga uwanon ang umaabot nga Piyesta Senyor.
Angay sang tun-an nilang Cuizon ug kaubanan ang sugyot ni Thads Bentulan, kanhi kolumnista sa BusinessWorld, nga labing epektibong sulbad sa pagkatanggong sa mga pasahero human sa Piyesta Senyor mao ang pag-abli dayon sa kadalanan nga malabyan sa kataposang dancing contingents. Matod ni Bentulan mas daling makahakot sa mga pasahero ang naandang mga sakyanan nga nagsubay sa mga ruta, inay ang buses nga wa mailhi sa mga pasahero ug wa kasuhito sa agianan.
***
Email: leo_lastimosa@abs-cbn.com