Haskang luoya ni Manny Pacquiao. Ang pagpaningil sa Internal Revenue Service sa Estados Unidos og $18.3 milyones (P807.7 milyones) nga utang niya sa buhis nakapabisto sa laksot nga pagpahimus sa Top Rank Promotions sa labing masaaron nilang boksidor ug gatasan. Wa lang sila mokapon sa makiangayon nga bahin ni Pacquiao sa iyang kita. Nilawog pa gyod niya paghimo og krimen pinaagi sa pagdumili pagbayad sa tukmang buhis.
Salamat sa katabian sa kadagkoan sa VisionQwest Accountancy Group, nanggawas ang pasiunang mga detalye giunsa pagmaniobra ang binahinay sa mga daog ni Pacquiao sa ibabaw sa ring ug sa bayad sa iyang endorsements sa gawas sa ring. Siya pay gitikasan, si Pacquiao pa gyod ron ang gipasagdan nga nagkupot sa basiyo nga buyot samtang gipaninglan na sa IRS.
***
Ato ning klaruhon. Ang VisionQwest di makapangangkon nga hingpit nga nanalipod sa interes ni Pacquiao. Gikiha nila si Pacquiao dihang giputol sa boksidor ang ilang kontrata ug gipulihan sila og laing accounting firm paghusay sa iyang problema sa IRS. Nipasangil ang VisionQwest nga utangan pa si Pacquiao nila hangtod karon.
Mahimo hinuong makatabang nato pagsabot sa kahimtang ni Pacquiao ang mga pasangil nga giluwatan ni Michael Lodge, chief executive officer sa VisionQwest, batok ni Bob Arum sa Top Rank. Sama nga makalili ta sa kamalupigon sa pagduma ni Arum sa mga away ug transaksiyon ni Pacquiao sa iyang pagpasabot nganong gikuha silang Pacquiao.
***
Matod ni Lodge gustong mahibaw-an ni Pacquiao pila ba gyod ang makiangayon niyang bahin sa nagkadako niyang mga daog sa iyang mga sangka ug bayad sa endorsements sa kalibotanong mga produkto. Nireklamo si Pacquiao nga wa siya kakita sa mga kontrata nga gipirmahan ni Arum alang niya.
Nipasangil si Lodge nga nagdumili sab si Arum paghatag nila og bisan unsang dokumento. Maong nangayo siya sa mga dokumento ni Pacquiao gikan sa Nevada State Athletic Commission. Nagduda si Lodge nga si Arum ang namugos ni Pacquiao pagbiya sa VisionQwest.
***
Matod ni Lodge nakakuha sila sa kopya sa mga tseke ug kontrata, gate proceeds sa mga sangka ni Pacquiao, mga ebidensiya nga giibanan ni Michael Koncz, business manager ni Pacquiao, ang bahin unta sa MP Promotions ug mga tseke sa gastohan sa undercards. Nipasabot si Lodge nga mapuslanon ang nakuha nilang kasayuran kay matandi sa bisan unsang pangangkon ni Arum.
Napamatud-an sab sa VisionQwest nga si Koncz nagtrabaho alang sa Top Rank busa di makapanalipod sa mga interes ni Pacquiao, labi na batok sa pamintaha ni Arum; ug nga kabahin sa utang nga gipaningil sa VisionQwest, gawas sa bayranan ni Pacquiao sa ilang serbisyo, mao ang kuwartang gigamit ni Koncz pagpalit og laing bay sa Estados Unidos.
***
Email: leo_lastimosa@abs-cbn.com