Kamapasalamaton sa Bohol

Tagbilaran City-- Ang daginutong suplay sa kuryente nga nakapasiga sa mga suga dinhi ug sa kalungsoran sa Bohol sugod karong semanaha, nga wa rang katunga sa inadlaw nilang panginahanglan nga 68 ka megawatts, gikan sa Sugbo. Nilampos ang National Grid Corporation of the Philippines pagsumpay sa Sugbo sa interconnection sa Leyte ug Bohol nga nainutil human nagguba ang geothermal power plants sa bagyong Yolanda.

Nakaseguro hinuon kong way Sugbuanon nga magbagulbol nga nilapad ang rotating brownouts sa Sugbo kay nakigsawo ang mga Bol-anon sa kuwang nang daan natong suplay. Pila ra ka adlaw tang nawad-an ug kuryente human sa bagyo, kapin na sa duha ka semana ang blackout sa Bohol.

***

Di lisod nga tabangan ang mga Bol-anon. Kini tungod sa ilang kamapasalamaton. Ang kadalanan ug mga bungbong nga ilang gisuwatan og mga mensahe sa pakitabang human sa makalilisang nga linog niadtong Oktubre 15 karon gipulihan na sa mas dagkong mensahe sa pasalamat. Sa bisan asang bahin nga akong nasum-okan dinhi ug sa mga dapit sa Sugbo nga nakasugat ko og mga Bol-anon lunsay nga pasalamat sa kamanggihatagon sa mga Sugbuanon ang akong nadunggan.

Dihang nabalhin ang nasudnon ug kalibotanong atensiyon ngadto sa mas daghang biktima sa bagyo, bisan wa pa hingpit nga makabangon ang mga Bol-anon sa linog, wa maibani ang ilang pasalamat sa mga nisagakay nila sa labing ngitngit nga mga takna sa pagkaggusbat sa tibuok nilang palibot.

***

Nagkinahanglan pa sila og tabang. Malipayon kong motaho nimo nga wa pa mohunong ang mga Sugbuanon ug ubang katawhan pagtabang nila. Nakadungan nako sa fast craft paingon dinhi ang mga pundok sibiko nga nagpasiugda og medical missions sa Sagbayan, Loon, Maribojoc ug ubang labing naggusbat sa linog.

Wa pa sab mobiya ang Kapamilya Relief Campaign sa Bohol. Gani nia ko aron pagtabang sa pag-atiman sa gatosan ka pasyente sa labing uwahing medical mission namo dinhi. Katabangan ang mga biktima sa bagyo sa way pagtalikod sa mga Bol-anon hangtod nga makabarug sa ilang kaugalingong mga tiil.

***

Mas tag-as ang ilang brownouts dinhi kay sa Sugbo. Apan inanay nang nabuhi ang ilang sistema sa tubig. Mas gawasnon na silang makagamit sa ilang cell phones ug magbayloay og kasayuran. May pipila na ganing nagsugod og pasiga sa ilang mga parol.

Nipasalig ang NGCP pagtuman sa deadline nga gipahamtang ni Energy Secretary Jericho Petilla nga mahibalik nang normal nga suplay sa kuryente sa Kabisay-an sa di pang Disyembre 24. Labing menos 1,400 ka kawani sa NGCP ang nagtukaw pagpabarug sa 566 ka poste sa kuryente nga nihagba. Matuman o dili, nahibawo na tang daan kinsay labing mapasalamaton nga di na hingpit nga magngiob ang ilang pagsugat sa Pasko ug Bag-ong Tuig.

***

Email: [email protected]