Pangandam sa rasyon kuryente

 Ang maayong balita mao nga dul-an tulo ka semana human sa bagyong Yolanda nahibalik nang suplay sa kuryente sa kabahin sa amihanang Sugbo, Bohol ug Leyte nga labing naggusbat sa katalagman. Ang di maayong balita mao nga nisamot pagburot ang kakuwang sa suplay sa kuryente sa tibuok Kabisay-an, apil na sa Metro Cebu nga nakaipsot sa labing pintas nga kastigo ni Yolanda.

Gihangop pag-ayo sa mga konsumidor nga nakasiga na pagbalik sa hapit tanang bahin sa amihanang Sugbo, gawas sa Daanbantayan, Medellin ug sa pito ka lungsod sa Bantayan ug Camotes. Nisamot ang ilang kalipay nga nahibalik nang suplay sa kuryente sa Bohol ug pipila ka bahin sa Leyte.

***

Duha ka dagkong suliran ang giatubang natong mga konsumidor sa kuryente sa Sugbo ug Kabisay-an: Una, ang dakong kakuwang sa suplay tungod sa pagkadaot sa mga planta sa kuryente sa Leyte; ug ikaduha, nga gihulagway nga mas dugay nga masulbad, ang mas dakong kadaot sa mga linya sa kuryente.

Ang labing dakong haw-ang sa suplay sa kuryente namugna tungod sa pagkaguba sa Unified Leyte, ang labing dako nga geothermal power plant sa Leyte. Apan ang mas dakong hulga mao ang pagkaputol sa mga linya sa National Grid Corporation of the Philippines nga maoy agian sa kuryente gikan sa mga planta ngadto sa mga panimay sa mga konsumidor.

***

Kon di pang kaandar ang Unified Leyte magpabilin ang kakuwang sa dul-an sa katunga sa panginahanglan sa Sugbo ug ubang isla sa Kabisay-an nga mokabat og 1,400 ka megawatts. Di katapak ang 180 megawatts nga gipaabot nga makuha sa NGCP sa sobrang suplay gikan sa Luzon sugod karong Disyembre 9.

Gipaningkamotan sa mga inhinyero nga maayo ang mga planta sa kuryente unya o sa di pa ang Disyembre 24 karong tuiga. Apan wa silay mahimo pagpadali sa pag-ayo sa naputol nga mga linya. Nga, segun sa kasaligang tinubdan, masumpay labing sayo unya pa sa Pebrero o Marso sunod tuig.

***

Mao nga angayng mangandam nang daan ang mga konsumidor sa gikahadlokan nga mas magkadugay ug mas magkalapad nga rotating brownouts sa mosunod nga mga semana. Kay way laing kapilian gawas sa pag-rasyon sa nihit nga suplay sa kuryente.

Apan di hingpit nga inutil ang mga konsumidor. Dako ang atong mahimo aron maibanan ang dakong kakuwang sa suplay. Pinaagi sa paglaslas sa atong konsumo, maibanan ang gitas-on ug ang gilapdon sa rotating brownouts. Ang Visayan Electric Co. makigtagbo sa Kapisanan ng mga Brodkaster ng Pilipinas  Cebu Chapter ug ubang sektor sa katilingban aron mapatuman ang mas lapad ug mas epektibong pagdaginot sa kuryente sa tulo ka peak hours matag adlaw: Alas-6-9 sa buntag; alas-2-4 sa hapon; ug alas-6-9 sa gabii.

***

Email: [email protected].