Loon, Bohol--Naabtan og duha ka adlaw ang Kapitolyo sa Bohol ug ang nasudnong gobyerno pagpada og hinabang sa mga biktima sa linog dinhi. Gipahibawo ko ni Mayor Lloyd Peter Lopez nga Miyerkules sa hapon na nagsugod pagpangabot ang mga hinabang gikan sa Dakbayan sa Tagbilaran ug Huwebes na sa buntag sila nakabuylo og panghatag sa mga hinabang ngadto sa nagkalainlaing mga barangay.
Nipasalig si Lopez nga ang kalangay sa pag-apud-apod sa mga hinabang wa maggumikan sa kakuwang sa paningkamot sa lokal nga mga opisyal. Di sab tungod sa kakuwang sa mga hinabang. Kon dili tungod sa kalisod lang gyod sa paglatas sa naputol nga kadalanan ug mga taytayan.
***
Lisod sabton ang grabeng kalangay sa pag-abot sa mga hinabang sa Loon. Nga duol ra kaayo sa Tagbilaran ug sa Tubigon, ang duha sa labing dakong pantalan sa Bohol. Kon naabtan og duha ka adlaw una naabot ang mga hinabang sa labing dakong lungsod sa Bohol unsa kaha kalangay ang pag-abot sa mga hinabang sa mas gagmay ug mas lagyo nga kalungsoran ug kabarangayan?
Sa sinugdanan, di ko ganahang motuo sa nisibaw nga reklamo sa mga Bol-anon pinaagi sa text messages, tawag sa telepono ug social media networks nga nahutdan na lang sila og pagkaon ug tubig wa pa gyoy hinabang nga niabot nila. Karon nabalaka na kong abunda diay ang sukaranan sa tiyabaw sa mga biktima.
***
Nakababag sa pag-abot sa dinaliang hinabang dinhi mao ang pagkaputol sa duha ka taytayan nga nagsumpay sa Loon ngadto sa nasudnong highway paingon sa Tagbilaran sa usa ka bahin ug sa Tubigon sa pikas nga bahin. Duha ang alternatibong agianan sa mga hinabang:
• Ang paglibot sa pikas nga bahin sa lalawigan nga maabtan og labing menos upat ka oras; ug
• Ang pagsakay og bangka gikan sa Tagbilaran nga mas hasol apan maoy labing laktod.
***
Ang ikaduhang ruta maoy nadiskubrehan sa Department of Social Welfare and Development nga labing maayong agianan sa pagtingob pagpada sa ilang hinabang. Naabtan sila og kapin sa adlaw una nakakumbinser sa Maritime Police pagpaggamit sa dagko nilang mga bangka. Pag-abot nako dinhi daghan nang nagtipun-og nga mga hinabang sa munisipyo.
May nitumaw hinuon nga laing suliran. Di kapatuyang ang mga sakyanan sa munisipyo paghatod sa mga hinabang ngadto sa mga barangay kay nahutdan na og krudo. Kay nahagsa man ang tulo nila ka gasoline stations kinahanglan pa silang mamalit og krudo gikan sa Tagbilaran. Maong niawhag si Lopez sa mga Loonanon nga wa kaayo maapektahi sa linog sa pagpahuwam sa ilang mga sakyanan o pagboluntaryo sa ilang panahon aron pagtabang sa pag-apud-apod sa mga hinabang ngadto sa labing tabanganan nilang mga silingan.
Nahadlok kong di monopoliya sa Loon kining maong kahimtang.
***
Email: leo_lastimosa@abs-cbn.com