Mga sangga ni Noynoy
Wa ko kahibawo sa ubang kontrobersiya ni Virginia Torres, ang pangu sa Land Transportation Office. Apan nabalaka kong wa siya magsulti sa tinuod sa duha ka labing bag-ong kontrobersiya nga naglambigit niya:
-Una, ang iyang pagduwa og casino nga bisan nakuhaan og video nga na-upload sa YouTube iya gihapong gipanghimakak; ug
-Ikaduha, ang iyang gihulagway nga boluntaryo nga pag-retiro sa kataposan ning buwana bisan sa mga taho nga gitaktak siya ni Presidente Aquino sa katungdanan.
Angayng daygon si Aquino sa wa pagdupa sa usa sa labing suod niyang sakop sa gabinete. Hinaot nga mohunong siya pag-apil og lingla sa publiko sa tinuod nga gidangatan ni Torres.
***
Nakakita ko sa video sa YouTube nga nagpakita ni Torres nga nagduwa og di lang usa kon dili duha ka slot machines. Una niyang lusot mao nga ang slot machine wa mahimutang sa casino kon dili sa usa ka hotel, nga niduol siya sa slot machine di aron pagsugal kon dili kay nadani siya sa mabulukong mga suga.
Kon tinuod nga nadani lang sa mga suga, nganong nagtulpuk-tulpok man siya sa unang makina ug dihang wa kaigo og bisan unsang kumbinasyon nibalhin pa man siya sa ikaduhang slot machine? Dihang naamguhan nga taphaw ang iyang lusot, nipadayag na og pagduda si Torres nga gi-setup siya.
***
Pasabot bang Torres nga gituyo siya pagbira sa iyang higala ngadto sa hotel? Diin nag-atang nang daan ang camera nga gipahipi sa lingkoranan atubangan sa slot machines? Ug gipaandar nang daan ang camera kay nahibawong daan ang tawo o mga tawo nga namaregla niya sa iyang kaulug-ulogan og mabulukong mga suga?
Atubangan sa iyang pag-insistir sa pagsubay sa tarong nga dan, lisod sabton ang kapakyas sa pamunoang Aquino pagpasaka og kaso ni Torres tungod sa klarong kalapasan sa lagda nga nagdili sa mga opisyal ug mga kawani sa gobyerno pagsud ug pagsugal sa mga casino. Nabawi hinuon og diyutay dihang nikumpisal si Aquino sa mga sakop sa media nga niuban niya sa Apec Summit sa Indonesia nga di na siyang kadupa sa pag-casino ni Torres.
***
Apan nganong di mang kapangisog si Aquino pagpahibawo nga iyang gitaktak si Torres sa katungdanan? Nganong mas mahinungdanon man alang niya nga di mauwawan si Torres ug ang pamilya ni Torres kay sa pagsulti sa mga magbubuhis, nga maoy tinuod niyang Bosing, sa kamatuoran?
Mao ba say hinungdan nga wa gyud siya motingog bisan ek na lang sa pangangkon ni Bise Presidente Jejomar Binay nga gitugotan ni Aquino ang pakigsabutsabot ni Binay kang MNLF Chairman Nur Misuari? Nga nisangpot sa iresponsableng pahibawo ni Binay sa ceasefire nga posibleng nisangpot sa wa kinahanglanang pagkakalas sa mga kinabuhi sa Dakbayan sa Zamboanga?
***
Email: [email protected].
- Latest
