Wa diay kinahanglana ang pagpawong sa cell phones, laptops ug tablets sa mga pasahero atol sa paglupad, paglawig ug pagtugpa sa mga ayroplano. Di diay tinuod nga mameligro ang kahimanan sa paglupad ug pagtugpa sa mga ayroplano kon gamiton sa mga pasahero ang ilang cell phones, laptops ug tablets.
Gani, wa gyoy lagda nga nagdili sa paggamit sa cell phones, laptops ug tablets atol sa paglupad, paglawig ug pagtugpa sa mga ayroplano. Ang Federal Aviation Administration sa Estados Unidos ug mga tagduma sa airline industry sa ubang kanasuran igo lang nisugo sa mga kompaniya sa ayroplano pagtuon unsang electronic gadgets ang luwas ug di luwas nga gamiton atol sa ilang flights.
***
Katapolan diay sa mga kompaniya sa ayroplano ang hinungdan nganong sud na sa daghan uyamot nga katuigan gihasol ta sa wa kinahanglana nga pagpawong ug pagtago sa atong cell phones, laptops ug tablets. Gihasolan na sila sa pagtuon unsa nga electronic gadget o kumbinasyon sa gadgets nga luwas nga gamiton o makahulga sa kaluwas sa mga ayroplano.
Hagbay ra hinuong nahibaw-an sa nagkadaghan nga mga pasahero ang dakong bakak sa mga kompaniya sa ayroplano. Nagdumili sila pagpawong sa ilang cell phones, laptops ug tablets. Ug way bisan usa sa mga ayroplano nga ilang gisakyan ang naapiki. O nahagsa.
***
Hagbay rang napamatud-an ang kaluwas sa paggamit og cell phones, laptops ug tablets atol sa paglupad, paglawig ug pagtugpa sa mga ayroplano sa daghang pagtuon nga gilusad sa nagkalainlaing kanasuran. Susama ang findings sa pagpasubli sa FAA sa nagkalainlaing pagtuon:
• Luwas ang paggamit sa mga pasahero sa bisan unsang hand-held electronic devices sa tanang bahin sa flights sa mga ayroplano; apan
• Angay nga padayong idili ang voice ug data communication, apan di tungod kay makapahimutang sa peligro sa ayroplano kon dili tungod lang kay mahimong makahasol sa komunikasyon tali sa mga tripulante sa ibabaw ug sa yuta.
***
Tungod sa findings sa iyang gitukod nga advisory committee nga gipangulohan sa representante sa Amazon.com mahimong tugotan na sa FAA ang paggamit sa cell phones, laptops ug tablets atol sa flights sa mosunod nga mga buwan. Nga mahimong sundon sab dayon sa ubang kanasuran. Bisan ang mga kompaniya sa ayroplano wa na molalis sa argumento sa kaluwas. May nahibilin pa hinuon silang duha ka taphaw nga panagana:
• Kon di hipuson ang laptops ug tablets mahimong malagpot, malamba, o makaangol og mga pasahero kon makasugat og kusog nga huros sa hangin ang mga ayroplano; ug
• Kon magsige na lang og tutok sa ilang cell phones, laptops ug tablets ang mga pasahero mahimong di na magtagad ni maminaw sa mga tugon sa luwas nga paglupad, paglawig ug pagtugpa sa mga ayroplano.
Email: leo_lastimosa@abs-cbn.com