Andam na gyod unta kong mapriso. Gipasidan-an ko sa mga abogado nga usa ni sa posible nakong dangatan sa akong pag-atubang ni RTC Judge Raphael Yrastorza pagtubag sa iyang pasangil nga nakahimo ko og indirect contempt human niya hukmi ang kasong libelo nga gipasaka ni kanhi gobernador Gwen Garcia batok nako.
Maong nagpatabang ko sa akong asawa pag-andam og gamayng bag nga sudlan og toothbrush, toothpaste ug t-shirt. Nagplano ko pagda sa bag ngadto sa Palace of Justice kon simbako ipabalhog ko sa prisohan. Ang huwes maoy namasangil nako. Unsaon man nako pagkumbinser niya? Maong gipaandam na ko sa tulo ka kahigayonan--grabeng kasaba, dakong multa o priso sa tibuok weekend.
***
Nagsakay na ko og taxi gikan sa ABS-CBN Broadcast Complex sa Jagobiao, Dakbayan sa Mandaue paingon sa Marcelo Fernan Palace of Justice sa Dakbayan sa Sugbo dihang nakabantay nga wa nako mada ang gamayng bag. Gani diha pa kong kahinumdom nga kay nag-birthday party man ko sa among bay sa Huwebes sa gabii nakalimot ko ug ang akong asawa pag-andam sa bag.
Pagkakita nako sa taas nga linya sa mga tawo nga mosud sa Palace of Justice diha pa kong kahinumdom nga nalimtan nako pagkuwintas ang akong ID. Maayo na lang nga diha diayng akong KBP ID sa pitaka. Maoy akong gihatag sa babayeng guwardiya bugti sa visitor's pass.
***
Nakaiban og diyutay sa akong kahasol ang presensiya sa daghang mga tigpaminaw sa DYAB nga nag-una na nako sa korte. Labi na nga pipila nila nagda og rosaryohan ug nipasalig nga nangaliya sila nga di ko mapriso. Gani naghuot nang mga lingkoranan nga wa nay laing bakante gawas sa lingkoranan sa kilid nga maoy nahimutangan sa mga abogado.
Nitapad kong Atty. Cheking Seares nga subli nakong gipangayoan og pasaylo kay naduhig lang sa akong kaso. Hingpit kong nikalma pagkakita sa akong abogado, si Atty. Celso Espinosa, kinsa sa iyang yanong kaligdong nipasundayag sa kaandam pagpanalipod nako ning labing uwahing hulga sa akong kagawasan.
***
Alas-8:30 sa buntag ang gitakda ni Yrastorza nga pagsugod sa husay sa mga kaso sa iyang sala. Alas-9:25 na siyang niabot. Natawag ang akong kaso alas-10 na. Ang usa ug tunga ka oras namong pagpaabot igo gyod nga nakapadagayday sa among singot. Nalabwan lang ang akong kaalimuot sa simpatiya sa mga abogado nga mas nagkadusingot kay nag-amerikana.
Wa ko kasab-i. Ni multahi, ni prisoha. Si Yrastorza hinuon ang kinahanglan nga mo-detalye sa iyang reklamo batok namong Atty. Seares. Unsaon man tuod namo pagpanalipod sa among kaugalingon nga wa man niya klaroha unsay iyang gipasangil nga kalapasan? Kon mahatag na niya ang "bill of particulars" duna pa mi 15 ka adlaw sa pagtubag.
***
Email: leo_lastimosa@abs-cbn.com