CIPC nakatabang ba?

Ang kahugpongan sa mga magpapatigayon nabalaka sa epekto nga mahimo tungod sa pagdungan og "resign" sa mga sakop sa Board of Directors sa Cebu Investment Promotions Center.

Bisan tuod og wala pa mabungkag ang CIPC apan lima sa iyang mga direktor nga gipangulohan ni Geronimo Sta. Ana mipahawa na. Nahibaw-an 'sab nako nga ang managing direktor nga si Joel Mari Yu tua sa abroad.

Gitan-aw man gud sa uban nga ang CIPC walay nahimong kaayohan tungod kay napakyas man kini pagbaligya og yuta diha sa South Road Properties sukad nga milingkud si Mayor Michael Rama.

Bisan ako, ingon niini ang akong pagtan-aw kaniadto kay nagtoo man ko nga ang CIPC nagsilbi ra g'yud nga marketing arm sa City Hall alang sa pagbaligya sa SRP ngadto sa mga investors.

Apan dili ra diay kini maoy trabaho sa CIPC, kon dili ang pag-promote sa tibuok Sugbo ngadto sa mga magpapatigayon sa laing dapit sa kalibutan aron anhi sila mobutang og patigayon, sama sa call centers ug uban pa.

Si magpapatigayon Philip N. Tan, miangkong suod kaayo nga higala ni Mayor Rama, miangkon nga nabalaka sila sa epekto sa posible nga pagkabungkag sa CIPC.

Presidente karon si Tan sa Mandaue Chamber of Commerce and Industry. Gitug-anan ko niya nga susama sila og baruganan sa mga magpapatigayon nga sakop sa Cebu Chamber of Commerce and Industry.

Giangkon ni Tan nga ang CIPC daku kaayo og natampo sa pagsulod sa daghang mga call centers dinhi sa Sugbo. Minus ra hinoon og natampo ang CIPC didto sa Mandaue.

Bisan ako nagtoo nga ang rason nga nagdungan ang lima ka director sa CIPC pagresign kay unsaon man nila sa paglihok kon ang ilang grupo wala na'y magamit nga pundo.

Kaniadto ang CIPC nagdawat og tulo ka milyon ka pesos nga hinabang gikan sa dakbayan sa Sugbo matag tuig. Dayon ang kantidad gipausbawan ngadto na sa singko milyones pesos.

Apan karong tuiga, wala ipa-release ni Mayor Rama ang P5.4 milyones nga gahin alang sa cash assistance para sa CIPC. Ang rason sa mayor nga dili man ang CIPC maoy marketing arm sa dakbayan sa SRP, kay naa man ang SRP Management Office nga gidumala ni Roberto "Bo" Varquez.

Ang mga magpapatigayon nga akong nahinabi miingon nga ang SRP Management Office moatiman lang sa posible nga mga mopalit og yuta sa SRP apan ang CIPC lapad ang ilang tahas nga mao ang pag-promote sa tibuok Sugbo.

Kini maoy angayang timbang-timbangon pag-ayo kon angay pa ba nga ipabilin ang CIPC, apan tan-aw nako sa mga magpapatigayon malipay sila kon ang CIPC ipabilin.

Apan ang problema, unsaon paglihok sa CIPC kon mohunong na ang dakbayan paghatag og tabang-salapi. Ang ubang mga dakbayan naghatag man kuno 'sab apan gagmay ra kaayo nga kantidad.

* * *

Bisan ako nagtoo g'yud nga dili tukma ang gihimo sa grupo ni Francis Paragas, ang Paglaum Basureros 20/20 Inc. nga mohimo kunohay og seminar unya mangayo'g bayad nga P750 gikan sa matag usa sa motambong.

Ang pangayoan nila og bayad mao kadtong motambong sa seminar aron kuno tudloan unsaon pag-andam sa gitawag og Environmental Sustainability Action Plan nga kabahin sa pagpatuman sa City Ordinance 2243.

Klaro kaayo nga adunay conflict of interest kay si Paragas sakop man sa Solid Waste Management Board nga magdawatan og tag P1,000 sa matag tigum nila.

Aw, "expected" na man nga dili gayud sila moangkon nga pangwarta ang ilang tumong apan dili malikayan nga moabot kini sa huna-huna sa katawhan, ilabi na sa mga magpapatigayon.

Ako maoy una nga reporter nga giduol sa mireklamo niini apan dili lang nako itug-an kinsa ang magpapatigayon. Nalipay hinoon ko kay si Paragas mihukom nga mohunong sa pagpahigayon og seminar nga dunay bayad.

Nasayud ko nga ang pagmugna sa Paglaum Basureros 20/20 Inc. ideya sa pipila ka opisyal sa dakbayan sa Sugbo ug nasayud na kita sa tumong.