Panaghiusa batok sa oil spill

Katahom sa pagtinabangay sa mga Sugbuanon. Dihang nisugyot si Cebu City Vice Mayor Edgar Labella nga magtigom og bunot, buhok, balhibo sa manok, ginamit nga mga sinina, laya nga sagbot, pakpak sa mais ug ubang indigenous materials nga makasuyop sa lana nga nikatap na sa kadagatan sa Cordova ug ubang bahin sa Metro Cebu, nabalaka ko nga talagsaon ug dinalian ra kaayo ang panginahanglan nga managana ang katawhan sa pagtabang dayon.

Apan sa makausa pa gipasundayag sa mga Sugbuanon ang talagsaon nilang panaghiusa sa pagbarog batok sa dakong kadaot sa kinaiyahan nga nakahulga sa kahimsog ug panginabuhi sa mga molupyo sa kabaybayonan apil nang mga patigayon nga nahilambigit sa turismo.

***

Nakabantay tingali sa akong kabakikaw sa radyo nga nagpasabot sa kamapuslanon sa indigenous materials nagbaha ang mga sugyot sa mga tigpaminaw sa Arangkada sa DYAB Abante Pa, Bisaya! asa makuha ang mga panginahanglan unsa pay lain nga makasuyop sa lana.

Nakadawat mi og dul-an sa gatos ka numero sa telepono ug busa nagkapuliki pagpanawag sa nagkalainlaing barber shops ug beauty parlors, lumber yards, dressed chicken shops, mga nagnegosyo og butong ug ubang mga patigayon nga may mga biya nga magamit sa kawsa. Mga tagduma sa furniture shops, mga galingan sa bugas, feed mills ug ubang mga negosyo nanawag sab pagtanyag sa ilang tabang.

***

Mga tigpaminaw sab ang mas maayong nipasabot nga mas maayo ang indigenous materials kay sa mga kemikal batok sa oil spill. Matud nila may mga kemikal nga igo lang mopaunlod sa lana ug busa makaguba una sa katigayonan sa dagat sa di pa mahilis. Gihulagway nilang indigenous materials nga maoy labing epektibo sa pagsuyop ug labing sayon nga kahimanan paghipos sa makadaot nga lana sa labing luwas nga paagi.

May mga tigpaminaw sang niboluntaryo pagpakitabang sa mga planta sa semento aron nga maoy mosunod paghipos sa indigenous materials nga puno na sa lana. Aron ilawog sa ilang mga planta inay ilubong sa yuta nga makamugna og dugang polusyon.

***

Mas nakumbinser ang mga Sugbuanon nga ang ilang panaghiusa makabuntog sa nagbuntaog nga hulga sa kinaiyahan dihang nipahibawo si Cebu City Councilor Gerry Carillo nga may lima na ka platoons sa kasundalohan sa Central Command nga andam nang modawat sa mga sangkap pagsuyop sa lana sa kabaybayonan sa Cordova nga maoy labing naigo sa katalagman.

Nipasalig ang mga sakop sa Association of Concerned Texters ug mga magtutudlo sa Sacred Heart School-Ateneo de Cebu nga motabang sa pagduma sa drop-off point nga gitukod sa Cebu City Hall sa Fuente Osmeña. Nipada sab og mga kawani ang Kapitolyo pinaagi ni Public Information Officer Ethel Natera uban ang mga trak nga nianam paghakot sa indigenous materials ngadto sa Cordova.

***

Email: [email protected]