Inay manghunaw lang dayon sa giingong anomaliya sa P3.39 milyones sa iyang pork barrel nga gigahin alang sa “Tony 'N Tommy (TNT) Free Medicines Program,†angayng mopasabot si kanhi kongresista Antonio Cuenco nganong iyang gisapawan ang Department of Health (DOH) isip implementing agency sa programa. Nagbuot-buot ba lang ang mga kawani ni Cuenco pagtukod sa TNT ug sa hingpit nang pagkontrolar sa pagpatuman sa programa?
O may bendisyon ni Cuenco ang gihulagway sa Commission on Audit (COA) ug sa Korte Suprema nga pagpanglaktod? Kon iyang desisyon ang paglaktaw sa DOH, maapiki ang pangangkon ni Cuenco nga buta siya sa gitumbok nga anomalusong mga transaksiyon sa TNT.
***
Maglisod si Cuenco pag-distansiya sa iyang kaugalingon gikan sa TNT. Kay pulos sakop sa iyang pamilya ang duha ka labing dagkong haligi sa TNT:
• Gitudlo niyang direktor sa TNT si Ma. Isabel Cuenco nga iyang umagad kay asawa man sa iyang anak nga si kanhi Cebu City Councilor Ronald Cuenco; ug
• Gitudlo niya nga laing direktor sa TNT mao ang iya gyong anak, si karon Cebu City Councilor James Cuenco.
Magpa-goryo-goryo si Cuenco sa mahinungdanong papel nga gihuptan sa iyang anak ug umagad sa TNT, andam ba siyang mopasangil nilang James ug Ma. Isabel nga nakigkonsabo sa mga nitampok sa iyang bukubuko?
***
Di makapangangkon si Cuenco nga sa papel ra kutob ra sa papel ang kalambigitan nilang James ug Ma. Isabel ug nga wa gyud silay aktuwal nga tingog sa mga transaksiyon sa TNT. Kay ang COA niklaro nga silang duha maoy labing mahinungdanon nga mga tagduma sa TNT:
• Si Ma. Isabel Cuenco ang gitumbok sa COA nga maoy nagbuot nga ang Dell Pharmacy maoy mo-suplay og tambal sa mga pasyente sa TNT inay nga ipahigayon ang makiangayon nga subasta; ug
• Si James Cuenco ang giila sa COA nga maoy nag-umol sa mga lagda unsaon pagpahimus sa mga pasyente ang libreng mga tambal.
***
Gitumbok nga utok sa anomalusong mga transaksiyon mao si Sisinio Villacin Jr., tag-iya sa Dell Pharmacy, kinsa gipasanginlan nga maoy niila sa peke nga mga pasyente, nihatag sa minao-mao nga mga reseta ug nidawat sa tanang bayad gikan sa pork barrel ni Cuenco. Si Villacin gikataho nga tua na ron sa Estados Unidos.
Mahimo bang ipasabot ni Cuenco nganong gitugotan niyang pilion sa iyang umagad nga si Ma. Isabel si Villacin ug ang Dell Pharmacy bisan way subasta? Andam ba gihapon si Cuenco nga motulisok ni Villacin nga mao ray nakakuwarta bisan sa kasayuran nga nahipos sa COA nga iyang anak nga si James ang nagpirma sa referral slips sa mga pasyente nga gigamit ni Villacin pagpaningil sa cashier sa Vicente Sotto Memorial Medical Center (VSMMC)?
***
Email: leo_lastimosa@abs-cbn.com.