Dupa sa buli ug acacia

Di makiangayon ang panaway sa buli. O acacia. Kay maoy kasagarang nangatumba sa pagbunok sa uwan. Di tinuod ang paniid nga di na angayng magtanom og dugang buli ug acacia. Kay makahatag lang og kakuyaw sa umaabot nga kaliwatan.

May mga panahom nga mas dali nga matumba ang acacia kay sa ubang mga kahoy kay labong kaayo ang dahon ug naglingkang pag-ayo ang mga sanga nga di na makapiog ang daginuton niyang mga gamot. May mga pangagpas sab nga ang buli mapuslanon lang sud sa pila ka tuig. Apan kon mokapin na sa 50 anyos magkahuyang nang punoan ug mameligro nang matumba sa naglibot nga kabalayan.

***

Pulos sayop ang mga pagdaot sa buli ug acacia. Pulos sila lig-on og mga punoan ug sama ra ka balanse sa ubang mga kahoy. Di sayop sa buli ug acacia nga sunud-sunod silang natumba sa pipila ka bahin sa Metro Cebu. Daghang sang nangatumba nga ubang kahoy apan ang buli ug acacia, salamat sa ilang kadagko, maoy labing gikaintapan.

Palihog susiha ang mga dapit nga natumbahan sa mga punoan sa buli ug acacia. Aron imong maklaro nga inosente silang mga biktima. Wa silay bisan gamay na lang intawon nga tinguha nga mopahimutang sa peligro sa mga kinabuhi ug kabtangan nga naglibot nila.

***

Sama sa naandan, tawo maoy sad-an sa pait nga kahimtang sa buli ug acacia ug ubang mga punoan sa kahoy. Kasagaran sa mga buli nga nangatumba nahimutang duol sa kabalayan ug dagkong buildings. Kasagaran sa mga punoan sa acacia nga nangatumba nahimutang sab sa daplin sa nasudnong highways.

Tungod sa panginahanglan sa pagkawot og lawom nga lungag aron pagpalig-on sa pundasyon sa kabalayan, buildings ug lapad nga kadalanan, ang mga gamot sa mga punoan sa buli ug acacia maoy kasagarang gipul-ongan. Mora silang mga higante nga gipamutlan sa mga tudlo sa ilang tiil maong humok na lang kaayong mapukling sa paghumok sa yuta tungod sa sunodsunod nga uwan.

***

Maong sa sunod higayon nga makabati ka og bugalbugal batok sa buli ug acacia palihog panalipdi sila ug ipahibawo ang kadako sa ilang pangalagad alang sa katawhan ug kinaiyahan:

1. Ambot may makalabaw ba sa kalapad ug kabugnaw sa landong sa mga punoan sa acacia sa mga plaza ug bisan sa labing init nga nasudnong highways; ug

2. Ambot may makalabaw ba sa hingpit nga kapuslanan sa buli--gikan sa iyang dahon, tukog ug palwa nga gihimong banig, silhig ug uban pang mga sangkap sa panimay ngadto sa tibuok niyang punoan nga maoy tinubdan sa labing lamian nga landang sa binignit nga maoy labing kinaham pag-alim sa kahapdos sa puasa sa kuwaresma ug painit paghingilin sa katugnaw sa uwanon nga kahapunon.

***

Email: [email protected]