Nahibung akong kaubanan sa ABS-CBN dihang nagdalidali og biya pagkahibawo nga di magsugod sa gitakdang oras ang among party pagsaulog sa ika-25 nga sumad sa among pagsibya dinhi sa Sugbo. Mas naglibog sila dihang akong giingnan nga modalikyat lang ko og palit og gamayng kable nga dugay na nakong nadunggan apan wa pa gyud nako makupti ni maggamit.
Nikanaog ko gikan sa function room sa J Center Mall paingon sa mga tindahan sa computer parts. Una nakong girumbo ang Octagon apan nahutdan na sila sa kable. Gipasa ko nila sa silingang CDR King. Batan-ong tindera nga niatiman nako nidiretso og tunol sa kable nga akong gipangita.
***
Tunga ra sa akong dangaw ang gitas-on sa kable. Tag-P30 ang usa. Nipalit ko’g duha. Mas nalangay siya sa paglista sa transaksiyon ug pagpapilit og gagmayng stickers sa akong pinalit nga maoy mohatag nako og kahigayonan pag-uli sa mga kable kon di depektuso ug di kapuslan sa mosunod nga pito ka adlaw.
Mora man siya og gikuwangan sa akong pinalit, namalihog na lang ko nga apilan sa labing barato nilang keyboard. Tag-P150 ra. Mas nadugay siya pag-ukab sa karton nga sudlanan sa keyboard ug sa pagpapilit na sab sa gamayng sticker isip timaan sa warranty. Wa kasabot ang akong kaubanan nganong malipayon kong nitambong sa party nga nagbitbit sa akong mga pinalit.
***
Palihog tuguti nga pasabton tika. OTG cable ang akong gipalit. On-the-go cable ang hingpit nga ngan. O USB OTG cable sa kinatibuk-an. Mao ni mosumpay sa tanan nakong gadgets. Nga kay hinimo man sa nagkalainlaing kompaniya managlahi og tumoy sa ilang kable ug busa lisod kaayong abuton.
Wa na unta kinahanglana ang kable kon napatuman pang sugo sa Europen Union nga pugson ang tanang kompaniya sa telepono ug ubang electronic gadgets paghupot og managsama nga tumoy sa kable aron nga di na maglibog ug maglisod ang mga konsumidor sa pagbalhin-balhin sa data o bisan sa pag-charge sa ilang gadgets.
***
Tungod sa kable mahimo na nakong idiretso pagbalhin ang mga letrato o video sa akong camera ngadto sa akong cellphone o tablet. Di na moagi sa PC una ma-upload sa internet o mabalhin isip local file sa ubang gadgets. Bisan ang iPad, iPhones ug iPod sa akong asawa mahimong masumpay sa akong Android phones ug tablets. Mas sayon nang magbinayloay og pribadong content nga di kinahanglang iagi sa social media networks.
Laing kapuslanan sa kable mao nga masumpay na sa lehitimong keyboard ang akong tablet ug telepono kon magsuwat og tag-as nga dokumento. Wa hinuon masumpay ang napalit nga keyboard. Giingnan ko sa mga tinuod nga makamao nga kinahanglang mopalit og mas mahalong kable. Kapuslan gyud tingali tong gagmayng sticker.
***
Email: leo_lastimosa@abs-cbn.com