Usa ka kongresista sa Sugbo niduol sa usa ka non-government organization (NGO) aron pagtanyag og hinabang nga tambal alang sa ilang medical mission. Gisabot niyang daan ang mga tagduma nga papirmahon sila og dokumento nga magpakita nga P1 milyon ang balor sa tambal nga ilang madawat. Apan bale og P50,000 ra ang tambal nga iyang ihatag.
Wa modawat sa tanyag ang NGO. Gipasabot ang mga representante sa kongresista nga di sila gustong mahilambigit sa posibleng komplikasyon. Nahitabo ni pila ka tuig nang nilabay. Human sa pagkabisto sa P10 bilyones nga eskandalo sa pork barrel, nakaginhawa og luag ang mga tagduma sa NGO nga wa sila patental.
***
Nakaseguro ko nga di sama kahakog ang ubang mga kongresista sa Sugbo. Di tingali sila sama kamapangahason nga mangilkil og hangtod 95% sa ilang pork barrel. Gawas nga di tingali sama kapating ang ilang mga paagi sa pagpangomisyon.
Sa pikas nga bahin, nahadlok ko nga di sama kaligdong ang ubang NGOs. May pipila gani nga di maghuwat nga tanyagan. Maoy manghagad sa mga kongresista ug mga senador. Ang uban wa gyud gani bisan unsang proyekto nga gipasiugdahan. Gi-drowing ra sa papel ang tanang detalye. Peke ang kahugpongan nga tigpatuman ug labaw nang peke ang mga ngan sa mga nangangkon nga nakadawat sa hinabang.
***
Silang Presidente Noynoy Aquino ug Budget Secretary Butch Abad nisuway paghigpit sa paggasto sa pork barrel aron nga di kaabusohan. Apil nang pagpahamtang sa bag-ong panginahanglan nga ilistang daan ang mga ngan sa beneficiaries sa di pa luwatan ang kuwarta.
Apan labihang kisikisi sa mga kongresista ug mga senador. Kuwang na lang nga mongaab ug moyaka. Morang gagmayng mga bata nga giilogan og duwaan. Masulub-ong balita mao nga inay barugan ang kampanya pagtul-id sa baliko nga dan nga gisubay sa mga magbabalaod sa daghan na uyamot nga katuigan, nahukman sa Malakanyang nga mas dinalian nga panginahanglan ang pagpalig-on sa ilang mayoriya sa Kongreso.
***
Sakto gyud diay silang Senador Joker Arroyo ug Senador Ping Lacson. Nga mao ray nakaangkon og tukmang kaisog ug kaligdong sa pagtahan sa ilang pork barrel. Sa sinugdanan, gipasanginlan sila nga naghilashilas. Apan atubangan sa way kinutoban nga mga eskandalo, sila ray hingpit nga nakalingkawas gikan sa kalang-og.
Nahagba ang tanang pangangkon nga ang pork barrel maoy dag-anan sa labing kabos nga mga distrito batok sa malambuong mga dakbayan tungod sa kaluag sa mga lagda sa paggasto sa kuwarta. Bugtong kalainan sa Kongreso ug sa labing kurakot nga mga buhatan sa gobyerno mao nga ang mga magbabalaod nagpaka-aron-ingnon pa hangtod karon. Salamat sa pork barrel, naghitak ang pinalitay og boto sa mga piniliay ug moungot ang bisan unsang kampanya batok sa pangurakot.
***
Email: leo_lastimosa@abs-cbn.com