Kinaham ni Rama

Naibanan ang akong bilib ni Cebu City Police Director Mariano Natu-el dihang nagdalidali pagkiha sa kawani sa shopping mall sa downtown area nga gipasanginlang mamumuno sa kustomer nga nasaypang kawatan. Tulo ang sipyat ni Natuel sa kontrobersiya:

• Una, ang kiha gipasikad ra sa testimoniya sa security officer sa mall nga gidudahang maoy tinuod nga utok sa pagpatay sa kustomer;

• Ikaduha, gigamit ni Natu-el isip usa sa ebidensiya ang autopsy report ni Police Medico Legal Officer Nestor Sator nga TB ang namatyan sa biktima sinalikway ang daghang timaan sa pangulata sa patayng lawas; ug

• Ikatulo, ang mga tagtungod sa biktima nidangop na sa National Bureau of Investigation (NBI) human nagduda sa kaligdong sa imbestigasyon sa kapolisan.

***

Mahimong nagdalidali silang Natu-el ug iyang mga imbestigador tungod sa talagsaong atensiyon nga gihatag sa publiko sa kaso. Nagduda hinuon ang pipila nga gituyo ni Natu-el ang laktod nga pagpasaka sa kaso aron makalikay ang mall gikan sa pagkaduhig sa eskandalo di lang tungod sa kapakyas pagbadlong sa ilang security officers kon dili sa kahigayonan nga gidasig sa management ang mga guwardiya paglapas sa balaod aron pagpatagam sa gidudahang shoplifters.

Maong wa ko mahibung nganong wa mobilib si Cebu Mayor Mike Rama ni Natu-el. Tingali mas daghan og kasayuran nga nahuptan ang mayor nga nakapakumbinser niya nga di takos ni haom si Natu-el pagduma sa CCPO.

***

Apan nagsugod ko’g duda sa kamakiangayon sa baruganan ni Rama dihang iyang gibasol ang pag-insistir sa Kampo Crame pagtudlo ni Natu-el sa CCPO sa pagsulbong sa kriminalidad sa dakbayan sa niaging mga adlaw. Ang mga bulilyaso ni Natu-el di paigo aron siyay han-okan sa responsibilidad sa sunud-sunod nga krimen.

Nisamot kakuwestiyonable ang baruganan ni Rama dihang nipasalig siya nga masumpo niyang kriminalidad kon itudlo na sa CCPO ang dugay na kaayo niyang girekomendar nga si Koronel Noli Romana. Lisod dasonan ang iyang gipasumbingay nga ang pagpaundayon sa PNP sa iyang bilib ni Romana makahimong mas luwas sa mga Sugbuanon.

***

Karong gilambigit si Romana sa ilegal nga sugal nga nisangpot sa pagkatangtang niya isip hepe sa kapolisan sa Negros Oriental, si Rama nipili pagdupa sa iyang kinaham. Inay sublion ang iyang rekomendasyon ug susihon ligdong o kurakot ba si Romana, gikuwestiyon na hinuon niyang timing sa pagrelibo human nasumiter ang ngan ni Romana sa Crame aron ipuli ni Natu-el.

Nganong di man hangpon ni Rama ang timing nga matarung pag-imbestigar ang pasangil nga apil sa pangolekta og tong sa ilegal nga sugal si Romana samtang wa pa pormal nga matudlo sa CCPO? Nganong ang iyang awhag nga hatagan si Romana og kahigayonan pagmatuod sa iyang katakos ug kaligdong wa man niya itugyan ni Natu-el?

***

Email: [email protected]