Di kada adlaw nga makasulti ka og duha ka presidente sa unibersidad sud lang sa usa ka adlaw. Maong gihangop nakong kahigayonan nga sa buwag nga mga tigom gikasulti nako silang Father President Enrico Peter Silab sa University of San Jose-Recoletos (USJ-R) ug Presidente Bonifacio Villanueva sa Cebu Technological University (CTU).
Apil ko sa mga nisaksi sa pagpirma nilang Fr. Silab ug ABS-CBN Visayas Cluster Head Tata Cinco-Sy sa kauyonan sa pagtinabangay tali sa USJ-R College of Engineering ug DYAB Cebu. Gikatagbo sab nako si Dr. Villanueva sa nagpadayon namo nga pagpangandam sa Grand Halad sa Kapamilya nga himuon karong Hulyo 6 sa CTU Main Campus.
***
Nabag-ohan ko pagsud sa buhatan ni Fr. Silab. Kataposan kong nakasud didto dihang tinun-an pa ko sa USJ-R ubos sa pagduma ni Fr. Rafael Cabarles. Kinsa nipahinumdom namo sa mga lagda nga angayng sundon sa among mga protesta batok sa usbaw sa matrikula ug ubang mga kontrobersiya sa among panahon.
Unang higayon kong nakakita sa linawas ni Fr. Silab. Kansang takos nga pagduma sa kontrobersiya sa usa sa ilang mga tinun-an nakapabilib pag-ayo sa mga Sugbuanon. Nikumpisal siya nga tungod sa kontrobersiya mas nakasabot siya sa trabaho sa media ug nipadayag sa kaandam sa padayon nga pakigtambayayong sa mga sakop sa media pagpalambo sa interes sa ilang mga tinun-an.
* * *
May laing bisita si Dr. Villanueva apan nilili ko sa iyang buhatan pagkahuman sa among tigom uban nilang CTU System Extension Services Director Greg Gamboa ug kaubanan nga motabang namo paghikyad sa labing dakong piyesta sa libreng mga pangalagad pagtimaan sa ika-25 nga anibersaryo sa ABS-CBN Cebu.
Malipayon siyang nitaho sa pagsulbong sa ilang enrolment--niabot na og 30,000 sa tibuok CTU System, ang main campus pa lang may 13,000 na ka tinun-an. Matod niya 4,000 ra ang ilang "carrying capacity" apan niabot og 30,000 ang ilang "carrying capacity."
***
Daghang salamat sa USJ-R ug CTU ug ubang mga eskuylahan ug mga institusyon sa ilang way kinutoban nga pagtabang sa among mga proyekto sa DYAB ug ABS-CBN Cebu. Uban sa ilang tabang, mas daghan pa ang mahalaran sa labing kabos, labing masakiton ug labing napasagdan nga mga Sugbuanon ug mga molupyo sa kasilinganang mga lalawigan.
Daghang salamat sa ilang pangalagad nga way giilang panahon, relihiyon, kahimtang sa kinabuhi, dapit nga gigikanan ni bulok sa politika. Nagsugod sa wa pa magtungkawo sa gahom ang mga opisyal sa gobyerno nga manamilit na karong semanaha. Ug magpadayon bisan human na sa pagbiya sa bag-ong hut-ong sa mga opisyal nga napili niadtong Mayo 13 ug pormal nang mobanos sa pagduma sa nagkalainlaing mga buhatan karong udtong tutok sa Hunyo 30.
***
Email: leo_lastimosa@abs-cbn.com