Katungod ni Mayor Mike Rama ang pagpili og mga kawani nga motabang niya pagduma sa City Hall sa mosunod nga tulo ka tuig. Sama nga katungod niya ang pagkuha sa department heads nga masaligan nga moabag niya pagduma sa gamhanang burukrasya sa dakbayan pag-alagad sa batakang mga panginahanglan sa mga Sugbuanon.
Hinaot nga ang pagpili ni Rama sa mga opisyal ug mga kawani sa City Hall ipasikad sa ilang katakos ug kahaom sa katungod. Di sa ilang bulok sa politika. Ni sa ilang abilidad sa pagbaiid ug pag-ulug-ulog niya. Kana kon gusto siyang molampos ang lab-as nga mandato nga gihatag sa mga Sugbuanon sa niaging piniliay.
***
Karon pa lang, may ngil-ad nang mga timaan: Gipasidan-an na niyang kaliboan ka kawani sa City Hall nga nidapig ni Kongresista Tommy Osmeña nga di na bag-uhon ang ilang mga kontrata nga mapupos karong buwana; ug gidasig na niyang department heads nga nagdumili pagpangampanya alang niya sa boluntaryong pagbiya sa katungdanan.
Way balaod nga malapas si Rama sa pagkaob sa kaldero sa kaswal nga mga kawani ug sa mga pamilya nga nagsalig nila. Apan di siyang kataktak sa department heads nga regular nga mga kawani. Apan way arang ni Rama. Mahimo niyang ilabay sa Kantipla silang Fidel Magno, Dr. Alice Utlang ug ubang department heads aron mapugos sila pag-retiro.
***
Sa di pa mohimo og hinanali nga hukom, mangahas ko pagpahinumdom ni Rama sa bililhong leksiyon nga angayng makat-onan sa mga politiko sa kasinatian ni Acting Cebu Governor Agnes Magpale sa iyang pagpuli sa namatay nga si anhing Bise Gobernador Greg Sanchez.
Gipabilin ni Magpale ang tanang kawani ni Sanchez, gawas lang sa lima nga napamatud-ang sad-an sa mga kasong administratiba nga gipasaka batok nila. Ang sangpotanan? Ang buhatan ni Magpale maoy nahukman nga labing maayo og performance sa tanang departamento sa Kapitolyo. Wa ni dapigdapig kay ang nihatag sa rating mao ang consultants ni suspended governor Gwen Garcia, nga suko na kaayong Magpale niadtong higayona.
***
Mahimo untang bawosan ni Magpale ang mga kawani ni Sanchez nga ngil-ad og sinultihan batok niya. Mahimo unta niyang gipakyaw og tangtang ang tanan ug gipulihan sa iyang mga sinaligan sa Danao ug ikalimang distrito. Apan gipalabi ni Magpale ang katakos ug kasuhito sa mga kawani sa ilang gimbuhaton kay sa politikanhong pagpanggukod. Ug gigantihan siya sa labing matinud-anon nilang pangalagad, labi na atol sa labing tandugong yugto sa pagduma sa Kapitolyo dihang nagdumili si Garcia pagtuman sa suspension order sa Malakanyang.
Napamatud-an ni Magpale nga mas mabungahon ang pagdasig sa gugma sa pag-alagad sa imong mga kaatbang kay sa pagtunglo nila. Hinaot nga makat-on sa leksiyon ni Magpale di lang si Rama kon dili hasta sab si Osmeña.
***
Email: leo_lastimosa@abs-cbn.com