Waldas sa Kapitolyo

Apil sa mga hinungdan nga nakit-an sa Commission on Audit (COA) sa nagbuntaog nga alkanse sa Suroy-Suroy Sugbo, nga naglakip sa pagpamalit og buses nga mas daghan pa kay sa nanguyog ug mga gastohan nga way klarong katin-awan, mao ang mas daghan nga nanguyog nga way bayad kay sa pipila nga nitakilid sa presyo nga gitakda sa Kapitolyo.

Usa unta ko sa mga bukong sa Suroy-Suroy. Kon nisanong pa sa mga imbitasyon ni suspended governor Gwen Garcia. Nga usa sa iyang kundisyon pag-areglo sa ikaduhang kasong kriminal nga iyang gipasaka nako.

Bisan nisangpot sa pagbanhaw sa ikatulong kaso, wa ko magmahay nga nibalibad sa pagsuroy-suroy uban niya.

***

Nagkalata ang mga sakop sa media nga gitangkil ni Garcia sa Suroy-Suroy. Pila gani nila gitanyagan niya og makabuhong nga parties kay naatol sa ilang birthdays ug ubang espesyal nga mga okasyon. Nakaseguro kong gilainan sila sa pabor nga nadawat, labi na kay nagduda, ug napamatud-an ron sa COA, nga buhis sa mga Sugbuanon ug di kuwarta ni Garcia ang gibusog nila.

Di sayon balibaran ang mga imbitasyon ni Garcia. Hapit matag adlaw kong gitawgan sa iyang mga sinaligan. Balibad nako sa matag higayon mao nga di ko mokuyog kon di mosanong ang ubang mga komentarista. Hangtod nga wa nay nanawag. Sunod nakong nahibaw-an nga dakpunon na ko sa ikatulong kaso.

***

Ang kadaghan sa mga sakop sa media nga nabuhong sa Suroy-Suroy maoy usa sa mga hinungdan nganong pila ra ming nangahas pagpanaway sa programa, labi na sa reklamo sa mga mayor nga ilang tanang gasto kay wa bahini ni Garcia sa bayad sa mga turista.

Puno sa libreng paniudto sa Kapitolyo, libreng biyahe sa nagkalainlaing kanasuran ug ubang gasa, ang Suroy-Suroy maoy usa sa mga hinungdan nganong humot kaayo si Garcia sa media bisan sa pagpanghasi sa kapolisan ug pagkumkom sa balaod sa pagsakmit sa iyang buhatan sa Kapitolyo.

***

Ambot nganong karon pa mangisog ang COA pagbaraw sa Suroy-Suroy nga gidudahang giabusohan sukad pa niadtong 2004. Sama sa mga kawani sa Kapitolyo, nakabatyag bang COA nga mas gawasnon na sila karong wa na si Garcia sa Kapitolyo?

Hinaot nga mautingkay pang ubang mga gasto ni Garcia. Nakalili ang mga Sugbuanon sa makalilisang nga waldas dihang naningil ang pipila ka suppliers human niasumir ni Acting Cebu Governor Agnes Magpale. Nanagana hinuon si Magpale pagtuki sa mga transaksiyon kay di ganahang dudahan nga namolitika. Karong daog na silang Governor-elect Junjun Davide, hinaot nga ibisto nang Magpale kinsay tinuod nga naggasto sa birthday party ni Noy Pabling, sa personal nga mga laag ni Paolo, sa dunot nga bugas sa CPDRC ug ubang transaksiyon ni Garcia ug iyang pamilya.

***

Email: [email protected]