Candulawan, Talisay City — Bisan sa pagkaugdaw sa ilang classrooms sa dayong tapos sa ilang klase niadtong Marso ning tuiga, ang mga tagduma sa Candulawan Elementary School ug Candulawan National High School pulos nipasalig nga andam na sila sa pag-abli sa klase karong Lunes. Ang mga tinun-an ug mga ginikanan di sama kamasaligon sa mga magtutudlo. Apan pulos sila way laing kapilian.
Mas layo ang baktason sa mga bata kon mamalhin pag-eskuyla sa kasilinganang mga barangay. Gawas pa, way seguro dawaton ba. Kay utro sang naghuot ang ubang mga eskuylahan sa mga molupyo sa ilang kaugalingong nataran. Maong sa gusto o sa dili, may clasrooms o wa, anhi sila maabtan sa pag-abli sa klase.
***
Si Vilma Mantua, prinsipal sa high school, nipahibawo sa ABS-CBN News ug DYAB Radyo Patrol nga nagkasabot sila sa prinsipal sa elementarya nga bahinon ang mga tinun-an sa duha ka shifts: Ang buntagon gikan sa alas-6 sa buntag hangtod sa ala-1 sa hapon; ug ang hapunon gikan sa ala-1 sa hapon hangtod sa alas-6 sa gabii.
Mga tinun-an sa elementarya magklase sa temporaryong classrooms nga padayon pang gitukod sa covered court dinhi puli sa walo nila ka classrooms nga naugdaw. Samtang mga tinun-an sa high school magsawo sa duha ka classrooms nga mao na lay nahibilin human sa sunog.
***
Nipasabot si Regional Director Carmelita Dulangon sa Departamento sa Edukasyon (DepEd) sa Central Visayas, nga kon di pa tungod sa nangasunog nga classrooms sa Candulawan matagbaw na unta ang kinatibuk-ang panginahanglan sa kapin sa libo ka bag-ong classrooms nga tukuron karong tuiga.
Matud niya magsugod nang pagtukod sa bag-ong classrooms kon matuman na sa Department of Public Works and Highways (DPWH) ang tanang panginahanglan sa subasta. Gihangop sab ni Dulangon ang tabang gikan sa pribadong mga kompaniya nga nipaluyo sa adopt-a-school program sa DepEd pag-iban sa kahuot sa classrooms sa Sugbo, Bohol, Negros Oriental ug Siquijor.
***
Si Mantua pormal nga mosuwat sa ABS-CBN Foundation ug Sagip Kapamilya Foundation aron mangayo og tabang sa pagtukod sa naugdaw nga classrooms sa high school. Usa hinuon sa suliran nga iyang nalantawan mao ang kakuwang sa titulo sa luna nga gitukoran sa mga eskuylahan sa elementarya ug high school dinhi. Tax declarations ray ilang gihuptan.
Nahibaw-an ni Mantua nga ang luna gipanag-iya sa usa ka pribadong pamilya ug gihatag ngadto sa gobyerno aron katukoran og eskuylahan. Apan hangtod karon wa silay nahuptan nga deed of donation. Gisaaran silang ipahimutang sa mas lapad nga luna nga titulado na sa ngan sa gobyerno. Wa pa hinuoy gitakdang petsa. Maong manguhit sila sa tabang sa pribadong sektor sa mas dinaliang sulbad. Sa kasamtangan, lugwayan lang una sa mga tinun-an ug mga magtutudlo ang ilang pailob.
***
Email: leo_lastimosa@abs-cbn.com