Daghang salamat sa manggihatagon nga mga Sugbuanon nga nakatunol dayon og mga hinabang alang sa mga biktima sa sunog sa Sitio Bato sa Barangay Ermita sa Dakbayan sa Sugbo. Ang Kapamilya Relief Campaign nakaapud-apod na sa pasiunang hinabang alang sa 250 ka mga pamilya nga nawad-an sa ilang mga panimay.
Matag pamilya nakadawat og duha ka kilong bugas, tulo ka latang sardinas, lima ka putos nga noodles ug usa ka sako nga sinina. Pasiuna lang ni samtang padayon ming nanghipos og dugang hinabang alang sa labing nagkinahanglan sa mga biktima.
***
Mga gamit sa panimay ang gipangayo sa mga biktima sa sunog nga nahinabi ni Najib Cubio sa DYAB Radyo Patrol. Hapit tanan nila way nahipos tungod sa kahilom sa pagsugod sa kayo ug nakatug na ang kasagaran sa mga molupyo dayong tungang gabii niadtong Sabado. Bisan gani ang mga nagtukaw sa haya diha na nakabantay nga dako nang kayo.
Nipasalig hinuon ang mga opisyal sa Ermita nga mas daling mahatagan og hinabang ang mga biktima human nadeklarar ang Bato nga calamity area. Matud ni Konsehal Imok Rupinta gobyerno ang tag-iya sa luna busa makabalik ang tanang molupyo. Mahimong mas gamay hinuon ang pipila ka pinuy-anan kay padak-an ang mga agianan aron di maglisod pagsud ang mga bombero.
***
Sa pikas nga bahin, mangahas mi pagdapit nimo sa piyesta sa libreng mga pangalagad atol sa Halad sa Kapamilya tibuok adlaw karong Huwebes, Abril 25, sa University of Cebu (UC) Main Campus sa dan Sanciangko sa Dakbayan sa Sugbo. May ipahigayon nga Kapamilya Local ug Overseas Job Fair. May libre sang ayo sa cellphones, libreng tupi, libreng masahe ug skills demonstration.
May one-stop-shop sa mga pangalagad sa mga buhatan sa gobyerno sama sa SSS, PhilHealth, Pagibig, POEA, NBI, DFA ug NSO. Hinugpong ning proyekto sa Tesda, DMDP, Dole, UC ug DYAB 1512 khz.
***
Nagpadayon ang rehistrasyon alang sa Kapamilya Run karong Hunyo 16. Kabahin ni sa “Silverasyon,†ang tibuok tuig nga kasaulogan sa ika-25 nga anibersaryo sa pagsibya sa ABS-CBN Cebu. Ang tinuig nga lumba sa dagan mosubay sa labing dagkong kadalanan sa Dakbayan sa Mandaue.
Mao ni bayranan sa mosunod nga mga kategoriya: P450 sa 25 ka kilometro (may ipanghatag nga medalya sa tanang makatiwas sa lumba); P350 sa 15 ka kilometro ug pito ka kilometro; ug P300 sa tulo ka kilometro nga fun run. Makaparehistro ka sa Wow Travel and More outlets sa Elizabeth Mall ug Robinson's Fuente sa Dakbayan sa Sugbo, J Center Mall sa Mandaue, Gaisano Mactan ug atbang sa Birhen sa Regla Parish sa Dakbayan sa Lapulapu; Runnr sa Ayala Cebu ug ABS-CBN Complex, Jagobiao, Mandaue City.
***
Email:leo_lastimosa@abs-cbn.com