Lapu-Lapu traffic

Basi sa mga report nga miabot kanako, nagpakita nga pwerte na ang pagkuyanap sa shabu diha sa lainlaing dapit sa probinsya.

Sa Barangay Maño, San Remigio dunay usa ka drug pusher nga ang ngalan Mamerto, dili lang usa nato ibutyag ang apelyedo. Atensyon mga polis diha sa San Remigio, atimana ninyo kining report nga akong nadawat.

Kini si Mamerto tagalaing lungsod ni siya pero naka pangasawa og taga diha. Awhag nako ni Mamerto nga moundang nalang kay basin og madakpan kara unya apil na'ng usa ka “Meo” nga maoy giingon nga tighatod nimo'g suplay.

* * *

Nakonpirmar nako nga dunay mga drayber sa multicab nga gigamit isip pasaheroan nga mogamit lang og plastik gallon nga sud-an sa gasolina nga gihimo nila nga “improvised tank.”

Ang rason niini mao nga dunay mga drayber nga dili motubil sa multicab sa dayon na nila'ng turn over sa laing drayber. Inig-abut sa turno nga itugyan na sa drayber ang multicab, ibton ra niya ang hose sa gallon.

Ang drayber nga mosunod, motaud na usab sa iyang gallon ngadto sa hose nga konektado paingon sa karburador. Paita g'yud, kuyaw kaayo kining gihimo sa maong mga drayber.

* * *

Usa ka kapitan sa lungsod sa Balamban gireport nga wala na magtagad sa iyang barangay kay diana magpuyo sa dakbayan sa Sugbo uban sa iyang kabit.

Mopauli ra sa iyang barangay sa Balamban kining maong kapitan panahon nga mohimo siya'g sesyon. Pastilan, wala na gani siya magtagad nga migrabe na ang pagpamaligya og shabu sa iyang barangay.

Gitoohan na gani nga kining maong kapitan posible nga nahimo na nga druglord kay pwerteng daghana na og mga sakyanan. Gitug-anan ko sa akong informer sa mga plate number sa sakyanan sa maong kapitan.

Uy kapitan! Naunsa ka gud tawon... nagpatuga-tuga ka man og lansar nga dili ka man diay moserbisyo. Nakapatukod na kuno'g condominium dinhi sa dakbayan kining maong kapitan uban sa iyang kabit.

May panahon ka pa kapitan sa pag-usab. Sa Balamban, kinsa ba kadtong kapitan nga nadakpan sa PDEA  sa kalambigitan niya sa illegal nga drugas?

* * *

Pwerte'ng pagkasaag nako diha sa Lapu-Lapu City adtong Sabado. Tungod kini kay ang ilang karsada walay “proper traffic signs” aron kadtong mga tagsa ra moanha diha makatultol sa agianan.

Kanang karsada paingon sa Marigondon aduna may gibutang nga “center island” nga kadtong mopaingon sa dakbayan mapugos gayud pag-right turn, dayon mo-left turn na 'sab. Ambot unsa kaha'y ilang tumong ana.

Pag-abot sa unahan, aduna may karsada nga paliko sa wala, apan duna 'say laing karsada nga deretso. Wala may karatola nga gibutang nga kadtong karsada paingon sa wala maoy padulong sa unang taytayan.

Abi ninyo, naabot ko sa Barangay Mactan unahan pa sa airport runway. Grabeha.Walay ayo ning nagdumala sa traffic diha sa Lapu-Lapu.

Tiaw mo nga wala gani sila makabadlong sa tag-iya og tindahan duol na sa Marigondon nga ang koral anaa gayud giukbok daplin na kaayo sa karsada? Dili imposible nga makamugna kini'g aksidente. Kon ako pay mayor, gipangtaktak na nako mo's trabaho.

Palihog Mayor Paz Radaza mandoi kining nagdumala sa traffic group diha sa Lapu-Lapu, ma polis man o sakop sa Lapu-Lapu City government nga tarungon ang ilang trabaho.

* * *

Giangkon ni Ma'am Ester Cubero, ang executive assistant ni Mayor Michael Rama, nga daghang scholars ang wala makakoha sa ilang tag P1,000 nga school supply allowance gikan sa dakbayan.

Ambot og mahatag pa ba kaha kini apan gipasalig hinoon ni Ma'am Cubero nga paninguhaon. Ang usa diay kuno sa rason mao nga walay maayong information drive ngadto sa kabataan nga mahimo na nila kuhaon ang kwarta gikan sa dakbayan.

Maayo unta og dili magpirmi kining maong problema kay walay kapuslanan nga magsige ta og pasiatab nga anaa kanang mao nga benepisyo para sa mga scholars unya dili diay mahatag sa mga tinun-an.