Mga reklamo, atong tagdon

Akong nahukman nga hatagan og taytayan ang mga magbabasa niining sinemana nako nga lindog aron makasumbong sila sa illegal nga kalihukan nga ilang nasigpatan sa tagsa-tagsa nila ka dapit.

Gisuwayan man gud nako pagpublikar ang akong contact numbers didto sa lindog nako sa Banat News ug walay hunong ang mga report nga akong nadawat.

Kini maoy angay himoon sa atong mga opisyal sa kagamhanan aron nga masayod sila unsay angay nila nga aksyonan.

Pananglit sa polis, daghan ko'g report nga nadawat kabahin sa illegal nga sugal sama sa masyaw, hantak ug drugas, ug uban pa nga problema.  

Nasayud man ta karon nga kon shabu, bisan asa naa na man ning problemaha. Nakabantay lang ko nga magpanagana ang mihatag nako og kasayuran pagtug-an sa ngalan sa mga pushers.

Sa masyaw, midagsang kuno pag-ayo diha sa Toledo sama sa Barangay Bato ug nagmahay ang mga tawo sa kapolisan nga mora'g wala magtagad. Sa Lutopan, Toledo grabe 'sab kuno kaayo ang pagpamaligya'g shabu.

Unya kon may operation ang kapolisan ug dunay madakpan mahibulong ang makakita kay makabalik man inigka-ugma. Wala kaha ni hukos-pukos?

Diha sa Molao, Compostela may mireklamo kay mora kuno'g wala magtagad ang ilang mga opisyal sa problema sa shabu. Nahadlok sila kay kaniadto manok ray pangkawaton, karon baka na g'yud ug nagtoo sila nga adis-adis ang mga kawatan.

May mireklamo sa mga ginikanan nga nagtungha sa kinder, grade 6 ug 4th year High School sa Pung-ol Sibugay kay pugson kuno sila'g pabayad og P200 kay para pagkaon ug sa toga.

Dunay mireklamo sa mga bus nga ang tambotso nagbuga og itum nga asu padung sa kilid. Misugyot sila nga himoan unta og lagda nga walay tambotso nga ipadulong sa kilid kay kon dunay PUJ nga matupad sa bus, busog tawon ang sakay sa asu.

Ang reklamo sa giingong mga “kulurum” nga nag-operate sa Citilink, ako na nga gipaaksyonan. Hatagi pa ko'g plate numbers nila, apan dunay mga Garage to Terminal vans nga green plate apan dunay franchise. Duna lang sila'y authority pagamit og green nga plaka.

Palihog diay Mayor Mike Rama ang nadawat nako nga report nga ang sakyanan nga giisyu nimo sa Barangay Babag (SKV 526 Toyota Hilux) gamit-gamiton ra kuno'g hatud-kuha sa usa ka bata diha sa Talamban. Kon tinuod man gani ni, kaabusado gud!

Angay'ng mopasabot niini ang drayber sa maong Hilux nga si Precious Seno Jr. kon tinuod ba kini. Ang report ra ba nga akong nadawat gamiton pa g'yud kini pagpangumpra diha sa Carbon.

Kamong mga polis nga mag-checkpoint ayaw mo pataka og panakop kay mireklamo tawon ang tag-iya sa motor nga plate No. 5961 YA kay gisita siya diha sa Plaza Independencia niadtong Sabado sa gabii.

Mipakita ang drayber sa rehestro sa motorsiklo nga gipa-renew niya kaniadto lang “Dec. 28, 2012” advance gani kay sa naandan nga Enero kay “1” man ang katapusan sa plate.

Mipasabot ang drayber nga mi-renew siya bisan wala pa ang Enero apan wala makasabot ang polis. Hatag na lang kuno siya'g P100 kay tanggongon man g'yud ang iyang motor. Abtika kuno nga midawat sa polis uy.

Duna 'say mireklamo sa wala maundang nga pagdagsang sa mga fixers diha sa LTO Regional Office-7 nga anaa usab mahimutang ang LTO-Cebu City Branch. Buyno, palihug tagda ni Sir Raul Aguilos.

May mihangyo diay nga maayo nga makalitan og drugtest ang mga drayber sa PUJ nga nagbiyahe sa Guadalupe nga moagi sa V. Rama Avenue kay daghan kanila adis-adis.

Gani dunay higayon nga ang maong mga drayber anha magparking sa palibot sa simbahan sa San Nicolas kay manuyop og shabu sa Pasil.

Dunay mi-text nako og nangutana ngano nga wala pangdakpa ang bus sa usa ka kompaniya nga tulo ka sakyanan usa ra'y plate number. Nakadungog na ko niini pero wala pa g'yud nako makonpirmar.

Hatagi ko'g dugang inpormasyon palihog kay ako'y moimbistigar ani. Kon may amigo diha sa LTO ang tag-iya niini, ibulgar nato sa publiko aron mapugos sila pagtrabaho pagsumpo sa binuang.

Ang reklamo ninyo i-text kanako sa 0933-570-0853.