Gwen TV

Wa kong katanaw og tibuok nga programa sa Sugbo TV. Wa sab kong kabasa og tibuok artikulo sa Sugbo News. Tuohi nga di ni tungod sa kakuwang og paningkamot. Gipakaingon man gud nako nga magbalikbalik rang mga programa. Busa mao ra gihapoy akong makit-an kon mabakante ko og mas taas nga panahon. Anugon nga wa na koy makit-an.

Gipakaingon sab nako nga mas daghang letrato kay sa mapuslanong kasayuran sa mga pahina sa Sugbo News. Mabasahan ra gihapon nako ang tanan inig abot sa higayon nga wa nay mas mapuslanon nga mga gimbuhaton. Anugon nga wa nay bag-ong mga kopya nga mapakli-pakli.

***

Nakugang ko pagkahibawo nga agresibo nga nanguha og dugang mga kawani ang Sugbo TV ug Sugbo News. Nga nisangpot sa pagkawa sa pipila ka sakop sa media gikan sa orihinal nga media organizations nga ilang gitrabahoan. Nahibaw-an nako gikan sa pipila nila nga mas dagkong suholan ug mga benepisyo ang gitanyag sa buhatan ni suspendidong Gobernador Gwen Garcia.

Pipila ka inila nga mga sakop sa media, kinsa namiya sa ilang mga organisasyon tungod sa laing mga hinungdan, gitawgan sab sa Kapitolyo. Gitanyagan og mas gaan nga trabaho ug mas dagkong suholan. May nidawaat sa tanyag. Apan kasagaran nibalibad ug nipadayon sa ilang orihinal nga mga plano.

***

Sunod nakong nadunggan ang mga istorya sa kasinatian sa mga nakatrabaho sa Sugbo TV ug Sugbo News. Apil nang pagkatangtang sa usa ka peryodista kansang bugtong atraso mao ang aksidente nga pagkuha og bakikaw nga anggulo sa ulo ni Garcia. Ug ang ang quota sa gidaghanon sa mga hulagway ni Garcia nga kinahanglang moggawas sa matag gawas sa Sugbo News.

Atubangan sa kontrobersiya nga nitumaw sa pagpasera ni Acting Governor Agnes Magpale sa Sugbo TV ug Sugbo News, makatabang tingali pagtino kon nalapas bang kagawasan sa pagpadayag ning lakang ni Magpale kining mosunod nga duha ka testimoniya sa mga nakatan-aw sa Sugbo TV:

***

Una, kining balita: “Si Gobernador Gwendolyn Garcia nipahibawo nga inugurahan ni Gobernador Gwendolyn Garcia ang proyekto nga gipasiugdahan ni Gobernador Gwendolyn Garcia. Matud ni Gobernador Gwendolyn Garcia nga atol sa inugurasyon ni Gobernador Gwendolyn Garcia sa proyekto ni Gobernador Gwendolyn Garcia, motambong si Gobernador Gwendolyn Garcia.”

Ikaduha, kining esena sa pakigsulti ni Garcia sa mga bata nga tinun-an: “Nakita na ko ninyo sa TV. Nakita na ko ninyo sa newspapers. Nakita na ko ninyo sa billboards. Ug karon nakita na sab ko ninyo sa personal. Asa man ko nga kinaguwapahan?”

“Sa personal!,” nagdungan ang mga bata.

Sunod nga nakit-an sa Sugbo TV si Garcia nga nipiko sa nag-abot niyang duha ka pad pagsangga sa iyang suwang, nga kasagarang gihimo ni Aiza Seguerra sa bata pang way buot.

***

Email: leo_lastimosa@abs-cbn.com