Nagpakauwaw lang!

Maayo ra kay giapil sa Ombudsman sa pagkiha ang GAD focal officer sa Barangay San Roque (Ciudad) ug ang laing kawani kabahin sa paghimo og mga dokumento nga nagpakita nga ang mga patay mitambong sa seminar.

Si Ligaya Britania maoy gisaligan sa mga opisyal sa barangay nga gipangulohan ni Barangay Kapitan Rogelio Ruizo aron pag-andam sa dukomento nga naglambigit sa pagpahigayon nila og seminar sa mga senior citizens.

Apan pastilan, apil sa lista sa mga tawo nga gipatoo nila nga mitambong sa seminar, naglakip sa namatay na nga kanhi Kapitan nga si Telesforo Rabaya nga unta unom ka tuig na man kini nga mitaliwan sa laing kalibutan.

Gipatubag si Britania sa Ombudsman ug matud niya nga ang nag-andam sa dokumento mao gayud ang kauban nila nga nagbansagon og Sumampong apan si Sumampong miingon nga wala usab siya mag-andam sa dukomento.

Pastilan, pag-sure mo uy! Nalipay ko nga gawas sa mga opisyal sa barangay giapil sila si Britania ug Sumampong sa mga gikiha ug ang kaso iduso na sa dili madugay sa Regional Trial Court (RTC).

Pagka klaro g’yud niining maong binuang uy. Tiaw mo, hasta ang patay na nga kapitan naapil sa lista.

Mipahugot kini sa pagduda ni kanhi Konsehal Lidiore “Boy” Miranda nga wala g’yuy kalihukan nga gihimo apan gihimo-himoan ra og dokumento aron mabulsa ang kwarta.

Aw, awhagon na lang nato ang higala ko nga kapitan sa barangay ug mga konsehal nga atubanga ninyo ang kaso. Kadaku nga pagpakauwaw niini uy, tiaw mo ang patay miapil sa pagtambong?

Basi sa dukomento, ang namatay na nga kapitan miapil pa pagkaon sa pagkaon nga gihatag sa mga mitambong sa seminar. Kataw-anan! Husto lang g’yud nga ibanlud sa bilanggoan ang mamatud-an nga sad-an niining kasoha.

Pasalamatan g’yud nako si kanhi Konsehal Miranda kay kun wala pa siya magpakabana, dili mautingkay kining maong isyu. Ihiklin usa ang argumento nga namolitika si Miranda sa iyang pagreklamo.

Ang isyu nga dunay nakahimo og binuang aron posible nga mabulsa ang kwarta sa kagamhanan.

* * *

Ang ngalan ni Joavan Fernandez nga sinagop ni Talisay City Mayor Socrates Fernandez nabutang na usab sa headline sa mga mantalaan kay nanghasi na usab sa mga kawani sa Shell gasoline station sa Talisay.

Mikontak kanako si Joavan kagahapon ug mipasabot sa maong hitabo. Giangkon ni Joavan nga pwerte niyang sukoa kay wala siya tagda sa mga kawani sa gasoline station dihang magpatubil unta siya og gasolina sa iyang sakyanan.

Nagdali kuno’s Joavan atul sa maong higayon kay muadto siya sa ospital aron pag-atiman sa iyang inahan. Hangtud karon anaa pa sa Intensive Care Unit (ICU) sa ospital ang iyang inahan.

Wala masayud si Joavan nga ang tagdumala sa gasoline station mimando diay nga dili usab siya patubilan og gasolina kay wala pa makabayad si Mayor Soc sa ilang obligasyon. Utang-bayad man gud na ang ila diha sa gas station.

Imbis ayuhon siya’g balibad, nag-iyahay ra man kuno’g palayo kang Joavan ang mga kawani sa gas station. Mao ‘sab diay nga nasuko si Joavan.

Ang report nga gipusil ni Joavan ang cashier’s booth sa gasoline station dihang wala g’yuy miatubang kaniya.

Gihulagway ni Joavan nga bastos ang maong mga kawani. Buyno, nakasabot ko sa gibati ni Joavan niadtong higayuna, apan bisan pa hinoon dili tukma ang iyang gihimo nga gipusil ang cashier’s booth.

Ako mismo nakasinati usab nga wala ko tagda sa dihang miadto ko’g gasoline station, Shell gihapon, diha sa Natalio Bacalso Avenue unahan sa eskena Tres de Abril.

Gitawag nako ang atensyon sa mga kawani sa mao nga gasoline station kay tiaw mo, gipasagdan lang ko nga nagpaabut sulod sa akong sakyanan? Kamong mga kawani sa gas stations, ayoha ang inyong trabaho.

Awhagon nako si Joavan nga pagmabugnawon na lang sa buot aron malikayan ang mga insidente sa umaabot nga higayon. Unya, kining labing ulahi nga isyu, tubaga lang kun moreklamo ang tagdumala sa gas station.