Usa ka pari

Dear Tita Salie,

Maayong adlaw. Usa ko sa mga tigbasahan sa imong column. Tagoa lang ko sa ngalan nga Mariel, bag-o lang naminyo. Anaa sa Ceres bus comp. nagtrabaho ang akong bana.

Nagpangedaron na ko og 24 years old, ug duna koy kambal. Ang gusto nakong patambagan nimo, Tita, mao kining kabahin sa akong matuod nga amahan. Tungod kay bag-ohay lang gyod namong nasayran nga sinagop lang diay mi sa magtiayon nga among gituohan nga ginikanan. Wala mi masayod nga dili diay namo tinuod nga amahan ang among namat-an og buot nga papa.

Among gibuhat ang tanan aron among mailhan ang tinuod namong amahan. Ug karon na-shock ko sa among nakuha nga inpormasyon. Akong nahibaw-an nga usa ka pari ang akong amahan, Tita. Natingala ko nganong napari siya nga buntis man kuno ang inahan sa dihang nagbulag sila.

Gusto unta ko nga magpaila sa akong amahan nga usa ka pari apan maulaw lang ko nga magpaila kaniya. Unsa may akong buhaton, Tita Salie? Palihog pasabta ko. Thank you so much and God bless.

* * *

Good day. Dili ka angay maulaw sa imong gilaraw karon nga magpaila sa imong amahan. Sayang kaayo ang imong effort sa pagpangita karon ug karon nga imo na siyang nakaplagan mohunong na hinuon ka. Ipadayon kana tungod kay ang mao nimong laraw nagdala kini og dakong kaayohan ninyong mag-ama. Kinsay nasayod nga dugay na diay usab siyang nangandoy nga mailhan ug makit-an ang iyang anak sa iyang pagkaulitawo. Tingali dugay na siyang nangandoy nga makit-an ang iyang anak pero maglisod siya pagbuhat o sa pagpangita tungod sa matang sa iyang kinabuhi. Kay dili maayo o dili nindot paminawon nga usa ka pari nangita sa iyang anak kay makaguba man kini sa iyang profession.

Dili ka usab maulaw kaniya tungod kay dili nimo sala ang mamahimong anak sa usa ka pari. Ug dapat nimong hunahunaon kanunay nga dili atong katungod ang pagpili kun  kinsa ang atong mamahimong ginikanan.

Tingali dihang seminarista pa ang imong amahan, dihang nag-eskuyla pa lamang sa pagkapari ang imong amahan nagkarelasyon sila sa imong inahan. Apan dili gyod sila alang sa usa’g-usa mao nga nagkabulag gyod sila. -- Tita Salie