Iyahay og um-um

“Naunsa ba sab sila uy? Para gamay’ng kan-on, di sila kahatag sa ilang ig-agaw nga nangayo? Kadawo na man sab!” ni Adela nga bag-o lang nibutang sa telepono.

Nisumbong iyang anak nga si Sonia nga gipangayoan sila’g kan-on ni Ben, pag-umangkon ni Adela, anak sa pagkadaga sa iyang manghod nga si Gina. May depekto man sab gud ni si Ben sa iyang pagkatawo. Adik og shabu. Unya may allowance nga diyes mil pesos matag bulan gikan sa iyang inahan nga tua’s  Amerika nagtrabaho. Kulang ang diyes mil sa iyang bisyo. Kay hastang mga barkadang de-motorsiklo muapil og kunsomo sa shabu nga pinalit ni Ben.

“Hunahunaon sab unta nila”. Nga mupakaon man gani ta’g iro, tawo na bay dili’ ni Romy, bana ni Adela nga nagtan-aw og TV sa ilang sala. Nilingi sa iyang asawa. Nia’s baryo Palhit ning dakbayan ilang balay giabangan. Nag-abang sila’g balay dinhi’s dakbayan kay nia ilang negosyo nga karenderya. Weekends lang sila mag-ulian sa probinsiya. Ang magtiayong Sonia-Jerry, bag-ong minyo, maoy nipuyo sa balay ni Adela sa Sibonga. Magtutudlo sila sa saring publiko sa maong lungsod.

Kini si Ben nagpuyo sa balay sa iyang mama nga silingan kaayo sa balay ni Adela. Way trabaho. Ug naa tanang bisyo. Na-spoiled sab kay dako og binulan nga kuwarta padala gikan sa inahan. Wa man siya  ilha sa nakapaanak sa iyang mama. Ug patay na sab ang nakapaanak sa iyang mama. Si Ben rang usa ang nagpuyo sa balay sa iyang mama. Pero dunay babaye maghigdaan diha. Lain lain kada gabii. “Sala ba diay nga gipakatawo siyang guwapo? ni Ben pa.

Ang nakanindot lang ni Ben, kay bisa’g adik ni siya, dili bayolente. Dili mangaway. Hilumon gihapon ni siya bisa’g high sa drugas. Magtungok lang. Mag-tripping og katulog bali’g tulo ka adlaw. Mao na nga inig mata, gutmon. Apan ang iyang mga ig-agaw wa gyud nalipay sa iyang bisyo. Maong bisa’g unsa ka gamay’ng pabor pangayoon ni Ben, di sila kahatag.

Kun binadyet ilang pagkaon, isipon sab unta nila nga maglabi man ilang kaon og libre sa mga paryente. Sa panihapon tua man sila’s ilang Tita Bella, iyaan ni Jerry. Sabado’g Domingo ato mang gasto sa kaon natong tibook pamilya” ni Romy.

“Ah, nasayod na ko. Ang ilang budget para ra sa panghindik , load sa selpon ug facebook. Sige man silang palitrato para sa facebook. Pa-display sa ilang kaguwapo ug kaguwapa”, ni Adela.

“Mao gyud. Apan kun wa sila maghunahuna ni Ben, sa iya na lang mama nga maayo kaayo nila. Kada uli ni Gina gikan sa Amerika, magkinagang sila’s regalo. Siyaro na man sab!” ni Romy.

“Pagkatinood, lainlain og depekto ang tawo. Unya, kun makakita sila’g pareho’g depekto nila, bisa’g kaila sila nga pareha nila ang depekto, magpakaaron-ingnon sila nga wala sila anang depektoha. Mao nay gitawag og selfish. Ila rang kaugalingon ang gihunahuna”, ni Romy. “Unsa may akong itubag ni Gina? Kay mo-teks ra ba dayon nako, inig sumbong ni Ben nga gihikawan siya’s gamay’ng pabor gipangayo?” ni Adela. “Ingna lang nga mismo si Romy, nisurender na sa kinaiya sa iyang anak. Ang anak, anak man gyud, bisa’g unsaon pa. Papasensiyaha na lang na’s Ben sa kinaiya sa iyang ig-agaw. Kay bisa’g unsa say depekto ni Ben, anak, anak man gyud gihapon ni Gina. Busa iyahay na lang ta’g um-um sa mga depekto sa atong mga anak,” ni Romy. Nipindot sa remote kay gibalhin og laing channel ang TV. (Katapusan)