Nanuroy sa usa ka higanteng mall sa dakbayan sa Sugbo ang managhigala nga sila si Darwin ug Felipe. Sayo sila nga nahuman sa ilang trabaho mao nga nagkasabot sila nga adto sa mall magpalabay sa oras. Namilipili sila og mga T-shirts. Giabi-abi sila sa mapahiyumong tindera nga nagbantay sa maong mga baligya. Mitukar dayon ang pagka tsikboy ni Felipe. Gigamit dayon niya ang iyang pagka maayo manulti nga mora’g salesman sa mga produkto.
Sanglit ambongan si Felipe, nga gituyo sa pagpatughoy ang buhok, nakabig dayon niya ang pagtagad sa hitsuraan nga tindera. Bisan og pipila pa lang ka minutos sila nga nagkaila daw kaila na sila sulod sa pipila ka tuig. Naniid lang ang higala ni Felipe nga si Darwin. Nagpahiyom kini nga nagpaminaw lang sa panagsultihanay nila ni Felipe ug sa tindera nga nagpaila nga si Chona. Nangimbitar si Chona nga mag-videoke sila.
Sanglit si Felipe hilig usab kaayo sa pagkanta wala gayud niya sipyata ang pagdapit ni Chona. “Dili ko makauban ninyo bai Felipe kay duna ko’y business miting anang mga orasa. Kamo na lang si Chona bai,†matud ni Darwin.
“Kun dili ka makauban karon bai Darwin, sa sunod Sabado na lang ta mag-videoke ug si Chona,†giingnan ni Felipe ang higala. Apan namugos gayud si Chona nga mag-videoke gayud sila si Felipe bisan wala ang higala niini nga si Darwin.
“Pag-videoke lang mo bai Felipe kay nangimbitar g’yud na si Chona nimo,†matud ni Darwin. Gidaug sa pugos si Felipe mao nga nagkasabot g’yud sila si Chona nga huwaton ang dalaga inig-off niini sa trabaho alas nueve sa gabii.
Giingnan ni Chona si Felipe nga adto siya huwaton sa gawasanan sa mga kawani. Sanglit kapin sa oras pa ngadto sa alas nueve, mipadayon pagsuroy-suroy sa mall ang duha ka managhigala.
“Giswerte ka karong gabhiona bai Felipe kay tan-aw nako nakagusto nimo si Chona,†giingnan ni Darwin ang higala. Unya may gihunghong si Darwin kang Felipe nga nakapakatawa pag-ayo sa higala.
Dihang hapit na ang alas nueve nananghid na si Darwin sa iyang higala nga mobuwag na kay muadto siya sa laing mall alang sa iyang business meeting. “Tug-ani lang ko ugma bai Felipe kun unsay mahitabo apan sigurado na ko nga dili magmahay si Chona nimo,†ni Darwin. Bisan si Felipe nakabantay nga nakagusto kaniya si Chona. Gi-imagine ni Felipe ang paraygon kaayo nga tinan-awan ni Chona kaniya kaganina sa matag higayon nga iya kini nga gikomedyahan. Atul usab sa ilang paggunitay sa kamot nahapyud ni Felipe ang kalumoy sa palad ni Chona. -- Sumpayan