Ka-inutil sa paukyab
Dihang niabot si Bise Presidente Sara Duterte sa visitor’s center sa detention facility sa House of Representatives sa alas-7:45 sa gabii niadtong Huwebes, Nobyembre 21, mahimo ra g’yud unta siyang balibaran sa House Sergeant-at-Arms Napoleon Taas sa pakigkita sa natanggong niyang chief of staff nga si Zuleika Lopez.
Kay ang visitation hours kutob ra sa alas-5 sa hapon. Pero kay bise presidente man, gawas nga honorary member si Duterte sa ilang Class 1984 sa Philippine Military Academy, nisugot si Taas nga magkasulti silang Lopez hangtod sa alas-10 sa gabii.
* * *
Ang unang sipyat ni Taas nasundan pa og laing tulo maong niresulta sa kaguliyang:
•Gitugotan niya si Duterte nga makasulod sa opisina ni Kongresista Polong Duterte bisan gi-shutdown na unta niadtong orasa ang maong bahin sa Batasang Pambansa complex kay walay sesyon ang mga kongresista;
•Nisugot rang niduaw pagbalik si Duterte ni Lopez pagka Biyernes sa buntag human sa tibuok gabii nga paglapas sa lagda sa seguridad; ug
•Gitugotan na sab si Duterte nga nibalik sa opisina sa iyang igsuon sa ikaduhang sunudsunod nga gabii niadtong Biyernes, Nobyembre 22.
* * *
Laing nakatampo sa kaguliyang maong mga sipyat nilang House Committee on Good Government Chairperson Joel Chua ug kaubanan:
•Bisan sa mga bulilyaso ni Taas, nga inutil pagpagawas ni Duterte, siya gihapoy gihan-okan sa problema nga nagkinahanglan sa atensiyon sa liderato sa House; ug
•Dihang nakadungog nga posibleng atakehon ang House sa mga dumadapig ni Duterte, nagdalidali og Zoom meeting ang komitiba ug nihukom pagbalhin ni Lopez sa Correctional Institution for Women sa Mandaluyong (bahala nang dili tawhanon ang pagpatuman sa sugo sa tungang gabii niadtong Biyernes).
* * *
Salamat sa kabanga ni House Speaker Martin Romualdez, mga doktor nang Lopez ang magbuot makatambong ba sa pagpadayon ugma, Lunes, Nobyembre 25, sa imbestigasyon sa anomalusong paggasto sa confidential funds ni Duterte. Ug kahimsog ni Lopez ug paukyab ni Duterte, imbes ang pagpangita ni Mary Grace Piattos, ang sentro sa nasudnong atensiyon.
Salamat sa nagkataas nang litaniya sa kabastos ni Duterte, apil ang paghulga pagpapatay nilang Presidente Ferdinand Marcos Jr., First Lady Liza Marcos ug Romualdez, walay nagtapok sa EDSA bisan sa kampanya sa ilang trolls pagpalagpot sa administrasyon.
- Latest
