Upat ug tunga ka toneladang bulawan. Apan kana kabahin lang sa mga gasa sa Rayna sa Sheba ngadto kang Hari Salomon sa dihang siya mibisita sa Herusalem. Tino kaayong nakahibalo ang rayna sa kaadunahan ug sa kalantip sa hari. Sayud siya nga wala nay gasa pa nga makapahingangha sa hari. Ang kamelyo makadaug og gibanabanang duha ka gatos ka libra samtang kini motadlastadlas sa disyerto. Kun dinug-ol o minugbo lang ang biyahe, mahimo pang moabot og upat ka gatos ang timbang ipakapin ang nagdumala sa renda. Ug kining pagduaw karon ni Rayna sa Sheba nagakahulogan og 45 ka kamelyo aron mapas-an ang gidaghanon sa mga bulawan.
Ang mga panagtagbo sa kakaraanang kustombre naglangkob og panagbayloanay og gasa. Ang pagpanumbalay nagpasabot og pagbitbit og gasa sarang ikahalad sa tagbalay. Bisan ang wala tuyoang panagbangal sa kamingawan nagpasabot gihapon og sinibuay og gasa. Bahala nag nagakahulugan kinig pinugsanay. Kay mao kiniy naandan busa gipatumanan sa walay kusmod, pu’ng pa.
Ang panagbayloanay og gasa sa karaang kultura usa usab ka paagi aron ipalabang ang mensahe sa pagpaubos o pagkamapaubsanon, labi na ngadto sa tawo nga halangdon sa katilingban ug kadtong labaw og posisyon diha sa atong pamuhatan, sa gobyerno, sa hinugpong kusog sa kasundaluhan, bisan diha sa relihiyosong tahas.
Sa kakaraanan, diha nay pagpaabot og mga gasa sa tuyo nga makapamarayeg og pabor kun di man makapamentaha. Urog na ang suburnohay.
Pipila niining mga gasa nga nahisgutan diha sa Karaang Kasabutan mao ang bulawan ug panapton nga gihatag sa sulugoon ni Abraham ngadto kang Rebekah ug sa iyang banay. Duna sab mga gasa alang sa katuyoan sa pagpakasal. Gitawag kinig bugay. Sumala pa sa Libro sa mga Hari 9:16, usa sa gatosan ka asawa ni Salomon nakadawat og entero lungsod gikan sa iyang amahan isip gasa sa kasal. Si Jacob sab nakig-uli sa iyang igsoon nga si Esau pinaagig gasa. Naglangkob kinig usa ka torilan sa mananap; 550 ka matang. Ug sa dihang nakadaug sa gubat ang Israelita batok sa Midianites, libuan ka hayop ang gihalad gawas sa alahas nga mitimbang og 420 ka libra.
Apan dili lang ang Rayna sa Sheba maoy unang nakahukom nga gasahan gihapon si Salomon taliwala sa iyang kadato. Daghan na ang mihatod sa ilang gasa sa atubangan sa hari, bisan mga roba, mga panakot, mga kahimanan-iggugubat, mga kabayo. Nabatasan naman gud kini.
Tingali ang labing mahinungdanong gasa nga natala sa Bibliya mao kining paghalad sa mga Mago ngadto sa Batang Hesus og insenso, mira ug bulawan. Insenso alang sa iyang pagkapari, mira alang sa iyang pagkamatay ug pagkabanhaw, bulawan alang sa iyang pagka-Hari sa tanang hari.
Apan ang maong kustombre natun-as dihang natagik ang Bag-ong Kasabutan. Kay wala naman kini mopahimug-at sa gasa nga atong ikahatag ngadto sa atong isigkaingon ug sa Buhing Diyos. Ang gasa, bisan og unsa kayano, nakapahimuot na man gani kaniya labi na og kini nagagikan sa kasingkasing nga manggihatagon ug nagmaya. Gani, gisilsil kini ni Hesus sa iyang ministeryo, sa dihang iyang gihimong panig-ingnan ang usa ka biyuda nga mihatag sa katapusan niyang duha ka dako. Kay wala naman siya mohatag gikan sa iyang pundo. Apan mitunol siya sa katapusan na niyang kinitaan. Ang mga biyuda maoy usa sa labing timawa sa panahon ni Kristo. Tungod kay daghan kanila ang wala nay katungod sa ilang kabtangan, wala nay mamana pag-usab aron unta nga dunay motimbang kanila, ug wala na sab kahigayunan makaanak og lalaki nga maoy moatiman sa ilang panginabuhian.
Ang maong balo mihatag sa iyang tanan sa walay bagulbol. Tungod kay nahigugma man siya sa tim-os sa iyang Diyos. Dili sama sa uban nga mihatag og diyot gikan sa nagtipun-og nilang bahandi. Unya may pakapin pang pamuyboy!
Gimbut-an nga kun kita manghatag, bakyawon sab nato ang matinud-anong kasingkasing. Kay labing mahinungdanon sa Diyos dili ang gidak-on ug gidaghanon sa atong gasa ngadto kaniya ug sa atong isigka-tawo labi na karong Paskoha, kundili ang kondisyon sa atong kasingkasing sa tumong nga kita manghatag.
Kun duna may angay sa naandan tang sinibuay rong Paskoha, kana mao ang mga gasa nga gipaambit na sa Diyos dinhi sa atong kinabuhi. Si Salomon, bisan sa iyang kaadunahan ug kamaalamon, nagpasalamat gihapon sa Ginoo sa gasa sa maayo ug yanong kinabuhi; pagtapos sa tanang gimbuhaton nga walay disgrasya sa matag adlaw, pagkahinanok diha sa katulogon, pagmalipayon ug pagkamainampuong makanunayon taliwala sa mga pagsuway (Ecclesiastes 3:13, 5:19).