Puto Maya

Kalit nga nihaguros ang hangin. Sunod nga mibundak ang kusog nga uwan. Dali nga nidagan si Jonathan ug nangita og kapasilungan. Sa usa ka sirado nga auto repair shop nakakita og lugar si Nathan kauban ang ubang mga tawo nga nagpasilong usab.

Hinay nga nilakat ang kagabhion ug ang ubang mga tawo naghinay-hinay na og lakaw. Ang uban nakakita na og kasakyan, samtang ang uban nakahukom nga suongon na lang ang ulan sa kahadlok nga dugay kining motuang.

Apan nagpabilin si Jonathan sa nahimutangan. Gikan siya sa trabahuan ug di mahimong mabasa iyahang sapatos ug karsones. Usa pa, wala siya’y trabaho ugma ug andam siya magpa-abot bisan pa hangtod mabuntagan.

Paglabay sa pipila ka gutlo, aduna’y traysikol nga namatyan og makina tungod sa gipasilungan ni Jonathan. Dali nga nanaog ang bugtong pasahero niini ug nagpasilong tupad ni Jonathan human makighinabi sa drayber.

“Naunsa daw to bay?” sukot ni Jonathan

“Nah, ambot. Dugay-dugay pa man daw maayo. Layu-layo pa raba to amoa” sumbalik sa maong tawo.

“Mao ba. Asa diay inyo?”, padayon ni Jonathan

“Sa Gun-ob.”

“Ah. By the way, Jonathan diay. Ikaw?”

“Randy.”

Dugay nga nagkahinabi ang duruha hangtod nabantayan nila nga upat na lang sila nga nagpabiling nagpasilong. Nipasiplat si Randy sa orasan sa tapad nga bakery ug nabantayan niya nga ala-una na sa kaadlawon hapit.

“Hala, kaadlawon na man diay”, matod pa ni Randy

“Bitaw noh”, uyon ni Jonathan.

“Mamainit una ta. Lami kaayo ikaon og init nga puto ug sikwate karong bugnaw ang panahon.“ agda ni Randy.

Ug nagkauyon ang duha nga mangaon og puto. Sa dili matino nga hinungdan, nawala ang kabalaka ni Jonathan nga mabasa iyahang karsones ug sapatos. Wala na kini niya igsapayan. Nasayod lamang siya nga ganahan siya makighigala ni Randy bisan kung bag-o lamang kini niya nakaila.

Nakahurot og duha ka puto si Randy samtang usa lamang ang gikaon ni Jonathan. Paghuman og kaon, nihinay na ang uwan ug may pipila na lamang ka lusok sa habuhabo.

Nagkasinabot ang duha nga mohapit una sa pampublikong parke sa dili pa magbuwag ilahang dalan. Daw sa susama ilahang taras ug huna-huna nga magkasinabot sila sa daghang butang bisan kung bag-o lang sila nagkahigala. Sa mga gusto motuo, mura sila og soulmate.

Tungod sa uwan, mingaw na ang maong parke. Ang kamingaw sa maong lugar gipasamot pa gyud sa kangitngit sa palibot tungod kay gipawong man ang tanang suga niini.

Namili ang duha og lingkuranan nga dili kaayo basa. Nagpahimutang sila sa ubos sa kahoy nga Acacia. Subli nga nagtabi ang duha mahitungod sa tagsa-tagsa nila ka kinabuhi. Daw sa dugay na sila nagkaila ug komportable na kaayo sila sa usa’g usa.

Natapos ang maong paghimamat sa laing matang sa painit. Sa kabugnaw sa panahon, gisaw-an nila ang kainit sa usa’g usa. Wala nila huna-hunaa ang kabalaka nga may makakita kanila. Malipayon sila sa usa’g usa ug mao lamang kini ang labaw’ng mahinungdanon alang kanila.

Sa huna-huna ni Jonathan, andam siya mosugal sa maong relasyon. Nakita na niya ang dugay na niyang gipangita.

Apan magmalampuson ug motunhay ba kaha ang usa ka relasyon nga nagsugod niining paagiha? May sukaranan ba ang panghinaot ug paglaom ni Jonathan?