Dakbayan sa Lapu-Lapu
Kanus-a man intawon ka magbinut-an,
Ug mosubay sa saktong dalan?
Imong ngalan pirmi nalang mahisgutan,
Sa radyo, telebisyon ug mantalaan.
Matag karon ug unya ikaw mosalida,
Mga tinugyanan sa balaod ikaw gipangita.
Ang dako lang nakong katingala,
Sa mga kamot sa balaod makaipsot ka.
Kay ikaw dupadupahan
Sa imong mabuyuhon nga amahan;
Bisan sa dayag nimong kasaypanan,
Ikaw gihapon labanan.
Ingon niana na gyud diay ka kagamhanan?
Balaod kanunay nalang nimong masibatan,
Daw sama ka sa tunok sa katilingban,
Nga naghatag ug kayugot nga hilabihan.
Adunay higayon nga matud nimo,
Magtinarung ka na kay naka amgo;
Nisaad ka nga mag bag-o,
Kinabuhi nga pinasubay sa Ginoo.
Tuod nag dahum ang kadaghanan,
Nga hingpit na ang imong kausaban,
Apan naunsa man ang kapalaran,
Nibalik ka naman usab sa naandan.
Dodong J, niining balak ko nalang ipaagi,
Ang akong tambag nga inamigo aron dili ka maapiki,
Ang tanan dili pa ulahi,
Nga imong usabon ug tul-iron ang imong kinabuhi.