Dibuho ni Ramon Taguchi
Pangindahay ning galamhan, dughang naghuot, nagluag
Sa alimpatakang nagkadaiyang butang nagkatibuag
Orasyong nagbalik-balik, rosaryohang naglubag-lubag
Diin ang lintunganay tuod ang gipaabot ug gi-awhag.
Padayon sa pagpanglusot ngadto sa bintanang nagbabag
Ang panan-aw ug huna-huna nagpabilin sa panglabhag.
O panahon, akong pangaliya ibutyag ang gikahinamang tubag
Alang sa kapahulayan ning nagsalimuang kong tanlag.
Takulahaw, mohunong sa utlanang way katapusan
Kay utlanan man ang tibuok nagtingkawong kalibutan
Apan magpadayun ngadto sa dayag nga hawanan
Kay gipaabot ang katapusang sarang di mahiaguman.
Hagawhaw sa mga aninong saag og samaran
Nangimogkimog ang kaunoran sa mga namatyagan
Nagduhiraw, gidamgong himamaton ug pagasundan
Hangtud sa ilang hinanaling pagkahanaw, gisabwag
Sa katapusan ngadto sa nagbantiaw’ng kahayag.
Tak-opan na sa kangitngit ang sidlak sa adlaw
Magpadayon sa paglakra ang nahabiling bangaw
Magpaabot sa katapusang gitiw sa gilaw
Iwakli ang maskara, atubangon ang katapusang suwaw
Dili na matu-is ang takda sa maong Labaw.