Ang mga tigdurar…
Punsisok sa katawhan, sila kasarangan
Naglaray daplin sa kadalanan
Nagpaabot, pilak o bulawan dili balibaran
Dawaton aron ang pagdurar pagasugdan.
Ang pagdurar…
Gamit ang gamay’ng alambre, ikaw-it ang pilak o bulawan
Ug dayon kini ituslob sa tubig nga nagbula, sinabonan
Garapong nanaglinya sa atubangan
Human sa unang paghumol, kuhaon kini aron brushan
Ikaduhang paghumol sa laing likido…ikatulo, balik-balik sa iyang tuslobanan
Aron kalimpyo ug kasidlak makita sa kataposan.
Ang sangpotanan…
Karon, limpyo ug sidlak na
Daw kinabuhi nga ang kalimyo makita na
Human sa pagkaligo, pagpahumot ug pagilis sa sanina
Pamayhon sa tawo nausab na
Apan pagdagan sa adlaw, mobalik gayud.
Ang kamatuoran…
Sa pipila ka adlaw nga pagsul-ob
Molutaw ang tinuod, mangitngit nga langub
Kay diay ang kamatuoran sa makadali kini naglukob
Sanglit dili man tiunay, ang kahangturan dili langkub
Nilalang sobra sa kalimpyo o kaambungan
Tinuod ba gyud siya,mahimong sumbanan?
O gumikan lang sa kausabang kasamtangan!
Ikaw, matinuoron o dinurar?
(Dibuho ni Ramon Taguchi)