Habal-habal driver nasakmitan og mga armas, bala

CEBU, Philippines — Sikop ang usa ka habal-habal driver nga giingong magsige og pasalba dihang giimplementar sa Criminal Investigation and Detection Group(CIDG) Lapu-Lapu City Field Unit ang ang search warrant batok sa suspetsado diha sa Sitio Talong Banker 1, Barangay Baring, Lungsod sa Carmen.

Ang CIDG Lapu-Lapu Field Unit nakig-coordinate sa kapolisan sa Lungsod sa Carmen sa pagsikop kang Raymond Singson Jayson, 26-anyos, adunay kaipon, nagpuyo sa Sitio Talong Banker 1, Barangay Baring, Lungsod sa Carmen.

Base sa taho sa CIDG Lapu-Lapu City Field Unit nga ang suspetsado giingong magsige og pabuto sa armas ug nag-sideline usab kini sa pagpamaligya og ilegal nga drugas hinungdan.

Nasayran nga ang CIDG Lapu-Lapu City Field Unit ang nakadawat og reklamo batok sa suspetsado.

Si Region Trial Court (RTC) Judge Ma. Josefa C. Pinza-Ramos sa Branch 90 sa Dakbayan sa Danao ang niisyu sa search warrant penetsahan January 28, 2026 batok sa suspetsado.

Nasakmit sa kapolisan gikan sa suspetsado ang ang usa ka kalibre .45 nga pistol, usa ka magazine nga adunay pito ka buhing bala sa maong armas, kalibre .38 nga revolver ug lima ka buhing bala niini, usa ka bala sa kalibre .357, usa ka holster nga color itom, tulo ka empty short steel magazine sa kalibre 5.56 M-16 ug duha ka long steel magazine sa kalibre 5.56 M-16 ug usa ka empty long polymer plastic magazine sa kalibre 5.56 M-16.

Ang suspetsado gikatakdang pasakaan og tukmang kaso sa nahimo niining kalapasan. (BANAT NEWS)