Inahan ug anak patay human nangahilo

CEBU, Philippines — Patay na nga napalgang ang usa ka inahan apil ang anak niini nga 3-anyos nga batang babaye human giingong nangahilo diha sulod sa ilang gipuy-an nga barong-barong nga ginama sa trapal niadtong Martes sa gabii diha sa Sitio Tamsi, Barangay Balud, Lungsod sa San Fernando.

Ang inahan mao si Marittes Rosane Cabaluna, 41-anyos ug ang anak niini nga 3-anyos.

Gikataho nga naabtan na lang nga nagbuwa ang baba sa duha dihang nakit-an kini diha sulod sa ilang gipuy-an.

Matud ni Police Chief Master Sergeant Herbert Pananganan, imbestigador sa San Fernando Police Station nga alas 12: sa tungang gabii niadtong Martes nadawat nila ang taho kalabot sa maong insidente.  Ang kapolisan daling niresponde ug naabtan nilang nagtuwad ang inahan sulod sa gipoy-an niini nga nagbuwa ang baba ug wala nay kinabuhi.

Samtang ang anak niini nga 3-anyos nga babaye nga gabuwa usab ang baba daling gidala sa mga kawani sa Municipal Disaster Risk Reduction and Management Office sa tambalanan apan gideklara kining patay na nga naabot sa tambalanan.

Base sa taho sa kapolisan giingong ang inahan ug anak duha ka adlaw na nga nagpuyo diha sa barong-barong gumikan kay gipalayas kini sa iyahang kaipon nga usa ka tricycle driver.

Ang mga higala ni Cabaluna ang nitabang kaniya aron makatukod og temporaryong kapoy-an.

Giingong kanunay’ng dapatan ang biktima sa iyahang kaipon ilabi na kon mahubog ug gawas niini samokon usab siya sa mga kabanay sa iyahang kaipon.

Sa wala pa nakaplagi nga wala nay kinabuhi ang inahan ug anak giingong nag-inom pa kini pagka alas 6:00 sa gabii kuyog ang mga higala niini.

Human nag-inom nilakaw ang mga kuyog ni Cabaluna ug gani nakit-an pa ang inahan ug anak pagka alas 8:00 sa gabii nga gaduwa-duwa pa.

Apan dihang gibalik sa iyahang mga higala si Cabaluna ug anak niini nag-ubo na ug gabuwa ang mga baba.

Ang mga hiagala ni Cabaluna daling nangayo kini og tabang.

Irekomendar sa kapolisan nga ipaubos sa autopsy ang patay'ng lawas sa inahan ug anak aron masuta ang hinungdan sa ilang kamatayon. (BANAT NEWS)