Nanghikap og pus-on ug nagpakita sa kinatawo sikop

CEBU, Philippines — Nabalhog sa prisohan ang usa ka 28-anyos nga lalaki human gipasanginlan nga nanghikap og pus-on ug nagpakita sa iyahang kinatawo ngadto sa usa ka 13-anyos nga dalagita diha sa Barangay Bulacao, Siyudad sa Sugbo niadtong Martes sa buntag.

Ang suspetsado mao si alyas “Mark”, usa ka glass installer, nagpuyo sa naasoy nga lugar nagtingkagol karon sa detention cell sa Inayawan Police Station sa Cebu City Police Office human kini gidakop sa 43-anyos nga amahan sa biktima.

Base sa taho sa kapolisan nga ang biktima nisinggit og tabang human giingong gikumot ug gihikap sa suspetsado ang iyahang pus-on.

Giingong gipakita usab sa suspetsado ang kinatawo niini ngadto sa biktima.

Ang suspetsado kinsa nahinabi sa DYSS Super Radyo Cebu nangangkon nga hubog siya niadtong higayona apan nakahinumdom siya sa hitabo ug wala siya nagbinastos.

Laing pangangkon sa suspetsado nga gitunol niya ang cellphone ngadto sa biktima kay mouli na kini ug sa ilang pagsugat giingong nakuratan ang biktima sa pagtunol niya sa cellphone.

Ang suspetsado nihimakak  kini sa pasangil batok kaniya ug matud niini nga iyang tupad ang amahan sa bata nga iyang higala ug natulog kay hubog.

Matud sa suspetsado nga gitawag siya sa amahan sa bata kay makig-inom diin bag-o lang kining naabot gikan sa kaulohan ug gustong maglingaw-lingaw.

Ang suspetsado nangangkon usab nga nangihi siya niadtong higayona ug gumikan sa kahubog nakita iyahang kinatawo ug wala siya'y intensiyon nga magpakita og kinatawo.

Kasong Acts of Lasciviousness in relation to Republic Act 7610 kun “An Act Providing for Stronger Deterrence and Special Protection Against Child Abuse, Exploitation and Discrimination, and for Other Purposes” ang ipasaka batok sa suspetsado. (BANAT NEWS)