20 ka badlongon sikop atol sa Fiesta Señor

CEBU, Philippines — Gikan sa pagsugod sa kalihokan sa Fiesta Señor ug Sinulog Festival 2025 ang Cebu City Police Office nakasikop og 20 ka indibidwal nga giingong nianhi lang sa Sugbo aron makapangbiktima.

Nagkanayon si Police Lieutenant Colonel Maria Theresa Macatangay, deputy city director for operation ug tigpamaba sa Cebu City Police Office(CCPO) nga human sa Walk with Jesus niadtong Enero 10, 2025 nakadakop sila og 16 ka tawo sa usa ka pension house.

Gireklamo ang maong grupo nga saba kaayo tungod kay nagsugal hinungdan nga giresponsehan kini sa kapolisan.

Atol sa pagresponde sa kapolisan dili lang ilegal nga sugal ang gihimo sa mga suspetsado tungod kay duha nila nakuhaan og ilegal nga drugas.

Base sa imbestigasyon sa kapolisan nitumaw nga ang 16 ka tawo nga nadakpan gikan sa kaulohan ug nianhi sa Sugbo tungod kay mangawat sa mga lugar nga dugokan og daghang tawo.

"Actually concerted atong effort, if you remember the Cebu Police Provincial Office has also arrested a group at Talisay who as well to conduct also the same type of crimes during the Sinulog season", matud ni Macatangay.

Niadtong adlaw'ng Domingo nga mao na ang Sinulog Grand Parade laing upat ka tawo ang nasikop sa kapolisan diin mga cellphone ang ilang nakawat hinuon na-recover kini sa kapolisan ug kadtong mga biktima nga dili taga Sugbo wala na usab nipadayon sa pagpasaka og kaso.

Base sa talaan sa CCPO nga atol sa Sinulog Grand Parade nakatala sila og lima lang ka krimen upat niini ang kaso sa pagpanguot ug usa ang physical injury itandi sa walo niadtong nilabay’ng tuig ug pito niadtong 2023 diin didto gihimo sa South Road Property ang kalihokan. (BANAT NEWS)