Transport groups nihangyo og usbaw sa pletehan
CEBU, Philippines — Gi-review sa Land Transportation Franchising and Regulatory Board (LTFRB) ang petisyon nga gisang-at sa transport groups alang sa P15 nga minimum nga pletehan sa mga public utility jeepney (PUJ).
Gibutyag sa LTFRB nga nakadawat sila og petisyon gikan sa nagkalain-laing transport groups nga patas-an ang minimum nga pletehan sa PUJ og P2 diin P13 ang kasamtangang minimum nga pletehan.
Ang maong hangyo nitumaw tungod sa nagkataas nga presyo sa gasoline.
Samtang giila sa LTFRB ang petisyon, si Chairperson Teofilo Guadiz III nagkanayon nga kinahanglan usab nilang ikonsidera ang kahimtang sa mga pasahero sa dili pa mohimo og desisyon.
"While we remain committed to ensuring that their livelihood is sustainable, we must also carefully balance this with the welfare of commuters who are equally affected by the current economic conditions”, matud ni Guadiz.
Uban sa pasalig sa board sa pagbalanse sa kaayohan sa mga transport operator ug commuters, si Guadiz nagkanayon nga ilang gisusi pag-ayo ang petisyon ug ikonsidera ang tanang mga hinungdan lakip ang fuel price trends, inflation rates ug ang kinatibuk-ang epekto sa ekonomiya sa mga pasahero.
Iyang gipasalig ang tanang stakeholders nga ang board mopahigayon og public hearings ug consultations aron masiguro ang transparency ug inclusivity sa proseso sa paghimo og desisyon.
"Rest assured, the LTFRB remains committed to delivering solutions that are fair and equitable for both our transport operators and commuters", dugang ni Guadiz. (BANAT NEWS)
- Latest
