Tag-iya sa pabuto nga nakapatay og bata gikasohan na

CEBU, Philippines — Gipasakaan og kaso ang 27-anyos nga lalaki kinsa gitumbok nga hinungdan sa kamatayon sa 10-anyos nga batang lalaki diha sa Barangay Candulawan, Dakbayan sa Talisay.

Matud ni Police Lieutenant Colonel Epream Paguyod, hepe sa kapolisan sa Siyudad nga kalapasan sa pagpalit og ilegal nga pabuto ang giatubang nga kaso sa suspetsado. Si Paguyod nagkanayon nga padayon pa ang ilang pagpangolekta sa ebedensiya aron mapasakaan og kasong reckless imprudence resulting in homicide with multiple physical injuries ang suspetsado.

Gikataho nga ang suspetsado maoy tag-iya sa “goodbye Philippines” nga pabuto nga nikagar ug gipunit kini sa grupo sa biktima niadtong pagsugat sa bag-ong tuig.

Ilaha kining gidala sa ilang dapit ug gihuho ang pulbura dayon butang sa buak nga tiles ug gipadat-ogan og bato ug gidakdakan og laing bato hinungdan sa pagbuto niini.

Namatay sa insidente si Jermie Cagang ug niangol kini sa iyang mga kauban nga nagpangedaron og 17, 16, 10 ug 8-anyos.

Matud usab ni Paguyod nga anaa pa sa tambalanan ang pipila sa mga naangol.

Samtang gitun-an usab nila ang pagpasaka og kaso sa 16-anyos kinsa maoy nidakdak sa bato ngadto sa tinapok nga pulbora. BDB BANAT NEWS