Tulo ka ex-convicts nagpinusilay, 1 patay

CEBU, Philippines — Usa ang patay samtang duha naangol sa nahitabong pinusilay tali sa tulo ka mga giingong mga ex-convicts diha sa Sitio Jansen, Barangay Basak San Nicolas, dakbayan sa Sugbo kagahapon sa hapon, Domingo, Enero 5, 2025.

Ang nakalas mao si Roell Capablanca Chua alyas Ikong, 33, nagpuyo sa naasoy nga dapit samtang ang mga naangol  mao silang Rowell Obaob Dignadice alyas Boboy,  ex-convict, residente sa maong lugar  ug si Giovanni Aniscal Gabor alyas Jojo ug alyas usab nga Ramil Abellar, 42, ex-convict sab ug nagpuyo sa Alaska Proper, Barangay Mambaling ning siyudad.

Sa impormasyon sa Mambaling Police Station 11 Cebu City Police Office, si Gabor nagpalit og ilegal nga drugas kang Chua ug Dignadice.

Apan giingong nasuko kini tungod kay wala gihatag ang iyang gipalit hinungdan nga nagkapinusilay ang grupo ni Chua ug si Gabor.

Giingong naginukdanay pa ang tulo diha sa lugar hinungdan sa pagkatibulaag sa mga tawo ug parehong nangasamdan.

Nakabawos matud pa og pusil ang namatay ug kauban niini kang Gabor apan nakadagan kini palayo. Apan wala na diha ang mga nangasamdan nga silang Gabor ug Dignadice sa pag-abot sa kapolisan.

Gisubay karon sa kapulisan kun diin sila sa nga mga tambalanan nagpatambal  ospital kay basin og nagpa admit. — /IBM (BANAT NEWS)